2017 թվականի խորհրդարանական ընտրություններին մնացել է 432 օր: Հայաստանում ընտրական գործընթացը վերահսկելու եւ արդար ընտրություններ ապահովելու համար «Քաղաքացիական պայմանագիր» կուսակցությունն իրականացնում է 6 հազար վստահված անձանց ներգրավում: Այսօր Երեւանում տեղի ունեցավ «Վեց հազար վստահված անձ» կայքի շնորհանդեսը: ՔՊ վարչության նախագահ Արայիկ Հարությունյանն ասաց, որ վստահված անձանց ներկայությունը հնարավորություն կտա ապահովել ազատ եւ արդար ընտրություններ: Նրա խոսքով, եթե ինստիտուցիոնալ ընդդիմությունը չի ձեւավորվում, ապա անընդհատ խոսելու են իշխանափոխության մասին ու չեն անելու:
Այդ տեսակի ընդդիմությունն ունի երեք տեսակի բաղադրիչ.
1. Ապագա Հայաստանի ծրագիրն է, որը գտնվում է ձեւավորման փուլում,
2. Իշխանափոխությունից հետո իշխանությունը ստանձնելու ունակ թիմի ձեւավորումն էր,
3. Երրոդը՝ 6000 վստահված անձի կարեւորագույն բաղադրիչն է:
«Փորձը ցույց է տալիս, որ ընտրությունների ժամանակ ընդդիմությունը չի իրականցնում ընտրական տեղամասերի վերահսկողությունը: Մենք նախատեսում ենք, որ յուրաքանչյուր 1997 ընտրատեղամասերում 3-ական վստահելի անձ ենք ունենալու, որոնք, վերահսկելով մեկը մյուսին ու ընտրական ընթացքը, կկարողանան վերահսկել ընտրությունների ընթացքը»,- ասաց Հարությունյանը, հավելելով, որ սկսում են գրանցումը։
Նշենք, որ շնորհանդեսի պահին միանգամից չորս քաղաքացի գրանցվեց:
Նախագծին մասնակցելու համար պարտադիր չէ լինել կուսակցության անդամ, գրանցումը կատարվում է առցանց: Կուսակցության նախագահի խոսքով՝ մինչեւ ընտրությունների սկիզբը գրանցվածների հետ դասընթացներ են կազմակերպվելու՝ ընտրությունների ընթացքը վերահսկելու վերաբերյալ:
ՔՊ վարչության նախագահը նշեց, որ տարբեր ակցիաների, միջոցառումների միջոցով փորձելու են վստահված անձանց թիվը հասցնել 6000-ի: Եթե չհաջողվի այդ թիվն ապահովել, այնուամենայնիվ, կուսակցությունը կմասնակցի 2017թ. ընտրություններին:
«Ընտրությունների սկզբին մենք հայտարարելու ենք, թե որքանով ենք ձեւավորել մեր ծրագիրը, որքանով ենք պատրաստ ընտրությունների, փորձելու ենք լուծումներ գտնել մինչեւ ընտրությունները: Բավական բարդ է իրագործել նախագիծը, բայց բոլոր նախադրյալները կան ասելու, որ հաջողություն ենք ունենալու»,- նշեց Արայիկ Հարությունյանը:
Կուսակցությունը չի բացառում նաեւ հետընտրական գործընթացը. «Մենք թավշյա հեղափոխություն կիրականացնենք, եթե ունենաք բավարար ապացույցներ, որ հաղթել ենք ընտրություններում: Հաջորդ օը հանրահավաք կհրավիրենք, բոլոր արձանագրությունները կներկայացնենք»,- ասաց Հարությունյանը:
Անդրադառնալով այլ ուժերի հետ դաշինքներ կազմելու հարցին, նա նշեց, որ այդ հարցն առաջիկայում կքննարկեն խորհրդի անդամները:
«Ինքս կարծում եմ, որ դաշինքային գործունեությունն իրեն սպառել է ՀՀ-ում: Որեւէ հաջողության մինչեւ հիմա դաշինքները չեն հասել»,- ասաց նա:
