«Ըստ էության՝ Հայաստանում տնտեսական աճի զարգացման այն մեխանիզմները չեն աշխատում, որոնք տասնամյակներ շաարունակ եղել են տիրապետող»,-հայաստանյան տնտեսական աճի և դրա հետ կապված խնդիրների մասին այսօր լրագրողների հետ հանդիպման ժամանակ խոսեց ԵՊՏՀ Տնտեսության կարգավորման և միջազգային տնտեսական հարաբերությունների ֆակուլտետի դեկան Ատոմ Մարգարյանը:
«3.1 տոկոս տնտեսական աճը մեր տնտեսության համար կարելի է ասել՝ թիվ չէ, բայց խնդիրն ինչումն է. եթե նայենք մեթոդաբանական, տեսական, միջազգային փորձին, ապա Հայաստանը տնտեսական աճի առաջին փուլը, որը հիմնված է արտադրության գործոնների՝ վառելիքահումքային ռեսուրսների, աշխատուժի ցածր արժեքի վրա, այս կամ այն ձևով անցել է. դա եղել է վերականգնողական շրջան, վերականգնողական տիպի աճ: Հիմա, եթե այսպես շարունակվի՝ կարող ենք մեծ կոլապսների բախվել»:
Ինչ վերաբերում է դրամի փոխարժեքին ու արտահանմանը՝ բանախոսը նշեց.«Երբ նայում ենք, թե 2015 թվականին ինչ ճնշումներ եղան դրամի վրա, այդ ճնշումների պայմաններում թվում էր, թե պետք է երերար դրամը: Բայց եթե նայենք, օրինակ՝ արտահանման վիճակագրությանը, ներմուծումը մոտավորապես 27 տոկոսով կրճատվել է, որը նշանակում է, որ արտադրության ծավալներն ընկել են, և նվազել են արտահանման պահանջները, հետևաբար թուլացել է ճնշումը դրամի վրա»:
Ատոմ Մարգարյանի կածիքով՝ կառավարությանը և տնտեսության ոլորտում քաղաքական որոշումներ կայացնողներին եթե հաջողվի տնտեսական նոր մոդել առաջարկել, այն պետք է լինի ինովացիոն տնտեսական աճի փուլ.«Այսինքն՝ այնպիսի որակական աճի փուլ պետք է լինի, որը հիմնված կլինի մոդեռնիզացիայի, նոր տեխնոլոգիաների, ոչ թե սոսկ աշխատատեղերի ստեղծման, այլ բարձր աշխատավարձերի վրա. իսկ սա բավականին բարդ խնդիր է»:
