Այսօր լրագրողների հետ հանդիպման ժամանակ տնտեսագետ Արտակ Մանուկյանն անդրադարձավ նաև այս տարի համաշխարհային տնտեսության մակարդակին: Ըստ տնտեսագետիˋ 2015-ը համաշխարհային շուկայում բեկումնային տարի է լինելու: Աճի տեմպերը կնվազեն, իսկ գլոբալ մարտահրավերները կշատանան:
«Այս մարտահրավերներից անմասն չի մնա նաև Հայաստանը: Հատկապես ԵՏՄ անդամակցությունից հետո: Պետությունների գերխնդիրն այս տարի կենսամակարդակի բարձրացմանն ուղղված քայլեր պետք է անեն: Մենք գնողունակության մակարդակի անկում ունենք, շրջանառությունը 13 %-ով նվազել է, ուստի նվազելու է նաև առևտուր իրակամացնողի շահույթը»,-ասաց տնտեսագետը:
Վերջինս սպասվող տնտեսական ծանր պայմաններում կարևորեց ՓՄՁ-ների առկայությունը: «Այս պայմաններում պետությունը պետք է կանգնի ՓՄՁ-ների կողքին, հատկապես, որ մանրածախ առևտուրը ՀՀ-ում լրջագույն խնդիր չունի: 2013-ի տվյալների համաձայնˋ գերփոքր կազմակերպությունների 18 %-ը դուրս է եկել բիզնեսից: Նման անկումն անմիջական կապ ունի խոշոր սուպերմարկետների ցանցերի ծավալման հետ»,-նշեց բանախոսը:
Վերջինս նկատեց նաև որ մեզանում սպասվող գնաճը անմիջական կապ կունենա ռուբլու արժեզրկման հետ, քանի որ ՌԴ-ն Հայաստանի համար մեկ առևտրային գործընկերն է և այնտեղ կատարվող գործընթացներից Հայաստանը ուղղակի և անուղղակիորեն ազդվելու է:
Վարդուհի Ստեփանյան
