Իսպանական դատախազության ներկայացուցիչը Պալմա-դե-Մայորկա քաղաքում տեղի ունեցող դատական նիստի ընթացքում (Բալեարյան կղզիներ) պահանջել է արքայադուստր Քրիստինայի` արքա Ֆելիպե VI-ի քրոջ ամուսնուն` Ինյակի Ուրդանգարինին դատապարտել 19,5 տարվա ազատազրկման, անձամբ Քրիստինայի դեմ դատախազն առաջվա պես մեղադրանք չի առաջադրել, հայտնում է «ՌԻԱ Նովոստին»:
Միակ փոփոխությունը, որ մտցրել է դատախազությունը Ուրդանգարինի նկատմամբ դատավարության շրջանակում, տուգանքի նվազեցումն է 1,11 մլն եվրոյից մինչեւ 980 777 եվրո:
Գործընկերոջը` Դիեգո Տորրեսին դատախազը պահանջել է դատապարտել 16,5 տարվա ազատազրկման, Բալեարյան կղզիների նախկին վարչապետ Խաումե Մատասին` հինգ տարվա, չնայած նախկինում 11 տարի էր պահանջում: Noos ինստիտուտի հաշվապահ Մարկո Անտոնիո Տեխեյրոյից դատախազությունը հանել է փողի լվացման մեղադրանքը` պահանջելով նրան դատապարտել թալանի եւ խաբեբայության մեղադրանքներով` երկու տարվա ազատազրկման, բայց հետագայում ժամկետը կարող է տուգանքով փոխարինվել:
Իսպանական ԶԼՄ-ների տվյալներով, Քրիստինայի դեմ միակ մեղադրողը մնում է կոռուպցիայի դեմ պայքարի «Մաքուր ձեռքեր» հասարակական կազմակերպությունը, որը հետագայում` ուրբաթ, կհաստատի այն ժամկետը որը նախկինում հայտնել էր` ութ տարվա ազատազրկում:
Ընդհանուր առմամբ գործով 17 մարդ է անցնում: Դատավարությունը սկսվել է հունվարի 11-ին եւ դրա ընթացքում մոտ 300 վկայի են լսել: Քրիստինային կասկածում են 2007 եւ 2008 թվականներին Aizoon ֆիրմայի միջոցով պետական գանձարանի դեմ հանցագործություն կատարելու համար, որի սեփականատերն էր նա ամուսնու հետ միասին: Ենթադրվում է, որ Noos ընկերությունը այդ ֆիրմային խոշոր գումարներ է փոխանցել, որոնք ստացվել էին անօրինական եղանակով մի շարք ինքնավար ընկերակցությունների վարչակազմերից, մասնավորապես` Վալենսիայի եւ Մադրիդի: Ինյակի Ուրդինգարինը եւ նրա ընկերը` Դիեգո Տորրեսը կասկածվում են հատուկ խոշոր չափերի ֆինանսական մեքենայությունների մեջ. խոսքը 6,2 մլն եվրո գումարի մասին է: Նրանք ղեկավարում էին Noos ինստիտուտ ոչ առեւտրական կազմակերպությունը, որը զբաղվում էր տարբեր մարզական միջոցառումների անցկացմամբ: Ավելի վաղ դատարանում ցուցմունք տալիս Քրիստինան հայտնել էր, որ Aizoon ընկերությունում բոլոր որոշումները կայացնում է իր ամուսինը` Ինյակու Ուրդանգարինը հարկային ոլորտում իր օգնականի միջոցով:
2016-ի ապրիլին «Մաքուր ձեռքերի» ղեկավար Միգել Բերնադը ձերբակալվել է մի շարք դատական գործերով մեղադրվողներից գումար կորզելու փաստերի հետաքննության հետ կապված, որոնցից իբր խոշոր գումարներ էին պահանջել մեղադրանքները հանելու համար: Այսպես, իսպանական ԶԼՄ-ների տվյալներով, Քրիստինայից մեղադրանքները հանելու համար կազմակերպությունը երեքից 20 մլն եվրո է պահանջել:
