Արդեն մի քանի օր է քաղաքապետարանի հարակից ավտոկայանատեղիում ոստիկանությունը արգելում է նստացույցի մասնակիցներին կայանել ավտոմեքենաներ՝ պատճառաբանելով, որ դա նախատեսված է ծառայողական ավտոմեքենաների համար։ Այս քայլով ոստիկանությունը կանգնել է ավելի բարդ խնդրի առաջ, քանի որ ստիպված է նաև թույլ չտալ կայանալ այլ սեփական օգտագործման մեքենաներ։ Սրանով ոստիկանությունը ստանձնել է քաղաքի «ամենաօրինապահ պարկովշիկի» դերը և ամեն օր առնվազն մեկ ոստիկան հսկում է քաղաքապետարանին հարակից ավտոկայանատեղին։ Երևի սա տեղավորվում է Վլադիմիր Գասպարյանի ոստիկանության դերի և վստահության բարձրացման քաղաքականության մեջ՝ ցույց տալով, որ ոստիկանությունը կիսում է աշխատավոր ժողովրդի դարդնուցավը։ Բացառված չէ, որ շուտով հայտնվեն նաև ոստիկան-թիկնապահներ(չնայած որ դա նոր պրակտիկա չէ, երբ ոստիկանությունում գրանցված աշխատակիցները կատարում են որոշ օլիգարխների անվտանգության աշխատակցի դերը), ոստիկան-գինեկոլոգներ՝ թույլ չտալու համար ծնվող աղջիկների և տղաների թվի անհավասարություն, ոստիկան-հողագործներ՝ կիսելու հայ շինականի հոգսերը։ Սրանով ոստիկանությունը երևի պատրաստվում է նաև ստեղծել «ոստիկան-ստայանշիկի» նախադեպ՝ հետագայում «Փարքինգ սիթի սերվիսին» իր լիազորությունների մի մասը փոխանցելու համար։ Սեփական տուգանային հրապարակ ունենալու պարագայում այս քայլը ամբողջովին արդարացված կլինի, իսկ ոստիկանությունը այլևս ստիպված չի լինի զբաղվել ավտոկայանատեղիների հարցերով և կլծվի լուրջ հանցագործությունների բացահայտման սուրբ գործին։ Այնպես որ պատրաստ լինենք քաղաքի փողոցներում տեսնել դեղին, ֆոսֆորով պատված արտահագուստով մասնավոր ոստիկանների՝ Վովա Գասպարյանի բարեփոխումների շրջանակներում։ Աստված հաջողի նման նախաձեռնությունները։
Սևակ Մամյան
