Այնտեղ որպես այդպիսին քրեական գործ չկա, իմ դեմ պատվերով սարքած գործ է, որը իրենից ներկայացնում է փուչիկ: Այս մասին Araratnews.am-ի հետ զրույցում ասում է վերլուծաբան Արգիշտի Կիվիրյանը, ում արդեն երրորդ անգամ հրավիրել են հատուկ քննչական ծառայություն:
Արգիշտի Կիվիրյանը ներկայանալու է ՀՔԾ:
«Փորձում են այդ փուչիկն ինչ -որ ձեւով դարձնել քրեական գործ: Այս եռուզեռը, գործը մի քանի անգամ հետ առաջ ուղարկելը, կապված է միմիայն դրա հետ: Փորձում են այդ փուչիկից գոնե ինչ- որ բան սարքել, որ դատարանում հենց որ լրագրողները եւ հասարակությունը ծանոթանան ողջ քրեական գործի նյութերին, իրենք չվերածվեն ծաղրուծանակի առարկայի: Չնայած տարբերակ չկա, իրենք վերածվելու են ծաղրուծանակի առարկայի»,-ասում է Արգիշտի Կիվիրյանը:
Նշենք, որ քաղաքացիական ակտիվիստներն էլ հաղորդագրություն են տարածել, ըստ որի այսօր ժամը 17:00-ին պատրաստվում են հավաքվել ՀՀ Գլխավոր դատախազության մուտքի մոտ սատարելու Արգիշտի Կիվիրյանին:
Հիշեցնենք, որ Արգիշտի Կիվիրյանի դեմ քրեական գործ էր հարուցվել ՀՀ ՔՕ 316-րդ հոդվածի 1-ին մասով եւ ՀՀ ՔՕ 333-րդ հոդվածի 2-րդ մասի 1-ին կետով: Մասնավորապես, դեպքի վերաբերյալ ոստիկանության աշխատողը՝ դասակի հրամանատարը զեկուցագիր է ներկայացրել, թե ոստիկանության ավտոմեքենայի մեջ Կիվիրյանն իր նկատմամբ բռնություն է գործադրել: Մինչդեռ Կիվիրյանը պնդում է, որ ոստիկանն է իր նկատմամբ բռնություն կիրառել նույն մեքենայի մեջ:
Լիլիթ Առաքելյան
