Այսօր մայրենի լեզվի միջազգային օրն է: «Ժառանգություն» խմբացության անդամ Անահիտ Բախշյանը շնորհավորում է ամբողջ հայ հասարակությանը մայրենի լեզվի տոնի կապակցությամբ եւ նշում, որ պետականորեն նշվող տոնի նպատակն է մեր պետության մեջ միշտ հաստատուն պահել մայրենիի դերը եւ երիտասարդության մեջ ավելի ընկալելի դարձնել մայրենիի նկատմամբ կարեւորությունը, հավատը եւ նրա գեղեցկությունը:
«Մարդ պետք է հասկանա, եթե մայրենինˋ որպես իր մտքերը արտահայտելու միջոց, մաքուր չօգտագործի, ինքը շատ դժվարությամբ կտիրանա այլ մշակույթներին»,-ասում է Անահիտ Բախշյանը Araratnews.am-ի հետ զրույցում:
Նա կարծում է, որ մայրենի լեզվի պահպանման գործում շատ շատ անելիքներ ունեն կրթության ոլորտի մասնագետները:
«Երբեմն շտեմարաններում պահանջներ կան, որոնք լեզվի ճկնունությանն ու հարստությանը չեն նպաստում»,-ասում է Բախշյանը:
Այն հարցին, թե որտեղից է գալիս հասարակության մեջ ժարգոնով, օտարալեզու բառերով խոսելու սովորությունը, տիկին Բախշյանը պատասխանեց, որ արմատները գալիս են ԶԼՄ-ներից, հեռուստատեսային հաղորդումներից եւ որոշ պետական այրերի «շատ վատ հայերենին» տիրապետելուց:
«Հեռուստացույցով որպես պետական այր, պաշտոնյաները կիրառում են ոչ պատշաճ հայերենը, դա տպավորվում է երեխաների մեջ: Էլ չեմ ասում երբեմն հեռուստատեսությամբ այնպիսի հաղորդումներ են դնում, որտեղ օգտագործվող փողոցային բառապաշարը անմիջապես մտնում է դասարան: Երեխաները ընդօրինակում են տգեղ հայերենը, իսկ դրանով լեցուն է մեր հեռուստատեսությունը»,-նշում է Բախշյանը:
Նա հավելում է, որ հումորային հաղորդումներն այնպիսի խեղաթյուրված հայերեն են ներկայացնում, որ եթե մեր լեզուն կենդանություն առներ, շատ մեծ բողոք կներկայացներ մեզ բոլորիս:
