Ժառանգություն խմբակցության պատգամավոր Զարուհի Փոստանջյանը կարծում է, որ տաքսու ոլորտում նոր օրինագիծը միտված է դաշտը մոնոպոլացնելուն:
Նա նշում է, որ տաքսու վարորդներն անձամբ նաեւ իրեն են դիմել, եւ լարվածությունն ու վրդովմունքը շատ մեծ է:
«Տաքսու ոլորտում անվերահսկելի գրդոնը շարունակվում է, եւ Գագիկ Բեգլարյանը դա անում է՝ տեղ բացելու համար նոր մեքենաներ ներկրելու նպատակով: Եվ, փաստորեն, նոր օրենքի նախագիծ կա, որով ուզում են մոնոպոլացնել նաեւ այս դաշտը»,- ասաց Փոստանջյանը:
Տրանսպորտի եւ կապի նախարար Գագիկ Բեգլարյանը, պատասխանելով Զարուհի Փոստանջյանին, նշեց.
«Եթե Բեգլարյան Գագիկը ուզեր մոնոպոլիա ստեղծել, տաքսիստների աշխատանքը չէր պարզեցվի, կբարդացվեր, որպեսզի ոչ բոլորը հնարավորությունը ունենային տաքսի քշել: Պարզեցնելով հնարավոր չէ մոնոպոլիա ստեղծել: Տրամաբանությունից դուրս բաներ եք ասում, ճիշտ չէ»:
Տրանսպորտի նախարարը հիշեցրեց նաեւ, որ իրենք փոխել են տեխսպասարկման եւ բուժսպասարկման վճարների պարագայում եւ վարորդներին ազատել դրանից:
«Դուք ասում եք՝ տաքսիստները բողոքում են, բայց եթե դուք նրանց հարցնեք, ապա կտեսնեք՝ նրանք ինչ շնորհակալություն են հայտնում տրանսպորտի եւ կապի նախարարությանը, որ այդ 25-30 հազար դրամը իրենք այլեւս չեն մուծում այդ կազմակերպություններին»,- ասաց Բեգլարյանը:
Զարուհի Փոստանջյանը հակադարձեց` նշելով, որ այսօր է օգտվել տաքսի ծառայությունից եւ վարորդը հայտնել է իր դժգոհությունը: Փոստանջյանը պնդում է, որ Գագիկ Բեգլարյանը պատրաստվում է մեծ քանակությամբ մեքենաներ ներկրել Հայաստան եւ տաքսիների ոլորտը մոնոպոլացնել:
