Քաղաքապետարանը նորանոր ճանապարհներ է փնտրում, որոնց միջոցով կկարողանա քաղաքացիներին համոզել, որ քաղաքային տրանսպորտի ուղեվարձի բարձրացումն արդարացված է: Քանի որ իշխանական վերին օղակները թույլ չտվեցին Տարոն Մարգարյանին գործադուլ կազմակերպել, այժմ նա ավելի «հետաքրքիր» մտահաղացումներ է փորձում իրականացնել:
«Ակտիվ երիտասարդ քաղաքացիների նախաձեռնություն» հասարակական կազմակերպությունը, որի ղեկավարը Տարոն Մարգարյանի տեղակալˋ Սամվել Մերթարջյանն է, կազմակերպում է բանավեճ՝ « Տրանսպորտի սակագնի բարձրացումն արդեն իսկ անհրաժեշտություն է» թեմայով:
Վստահաբար կարելի է ասել, որ միայն Տարոն Մարգարյանի թիմում կարող էր նման գաղափար ծնվել, և նրանք հույս ունեն, այս ճանապարհով ինչ-որ արդյունքի հասնել: Այստեղ զարմանալին այն է, որ բանավեճին մասնակցելու են երիտասարդներ, ովքեր, ըստ բանավեճի սկզբունքի, կողմ են թանկացմանը: Հասկանալի է, որ սա բեմականացում է, և որ այդ «կողմ» երիտասարդները, այնքան էլ կողմ չեն, քանի որ, իրենք հնարավորություն չունեն, ինչպես Տարոն Մարգարյանը, շրջել ծառայողական մեքենաներով, սակայն պետք է ձևացնեն, թե «կողմ» են, և ամեն ինչ կարգին կլինի:
Պետք է շտապել հիասթափեցնել Տարոն Մարգարյանին, որ որքան էլ այդ մասնակիցները ձևացնեն, թե կողմ են, միևնույն է, բանավեճի ավարտից հետո տուն են գնալու և չեն ցանկանալու վճարել ավելին, քանի որ դա իրենց գրպանին է վնաս: Անիմաստ է փորձել տարբեր ճանապարհներով՝ քաղաքացիների «վզին փաթաթել» մի որոշում, որի կողմնակիցը չեն:
