Թուրքիայում ոստիկանությունը արցունքաբեր գազ և ռետինե փամփուշտներ է կիրառել ցուցարարների դեմ, որոնք բողոքի ակցիա էին կազմակերպել Ստամբուլի կենտրոնում` քրդական անջատողական շարժման կին ակտիվիստների սպանության տարելիցի կապակցությամբ։ Այս մասին հաղորդում է France Presse գործակալությունը։
Հարյուրավոր քրդեր հավաքվել էին՝ պահանջելու հետաքննել այս գործը և գտնել մեղավորներին։ «Հանցագործությունը բացահայտելու փոխարեն ոստիկանությունը հարձակվում է ցուցարարների դեմ։ Սա ցույց է տալիս, որ թուրքական իշխանությունները պաշտպանում են մարդասպաններին», — ասել է բողոքի ակցիայի մասնակիցներից մեկը։
Հիշեցնենք, որ 2013 թվականի հունվարի 9-ին Քրդական աշխատավորական կուսակցության երեք ակտիվիստ գնդակահարվել էին Փարիզի քրդական կենտրոնում։ Նրանց մեջ է եղել նաև Սաքինե Ջանսըզը, ով այդ կազմակերպության համահիմնադիրներից մեկն էր։
