«Առավոտ» թերթը գրում է. «Գորիսի նախկին (1992- 1994 թթ.) քաղաքապետ, տարածաշրջանի ինքնապաշտպանության կոմիտեի համանախագահ Սամվել Հարությունյանը նամակ է ուղարկել ՀՔԾ պետ Վահրամ Շահինյանին:
Պարոն Հարությունյանն ՀՔԾ պետին նամակ է ուղարկել` իր բազմաթիվ հրապարակումներն անարձագանք տեսնելուց հետո. «Հունիսի 1-ին Սյունիքի նախկին մարզպետի Սուրիկ Խաչատրյանի առանձնատան դիմաց կատարված հանցագործությունից հետո ունեցել եմ 60-ից ավելի հոդվածներ, հարցազրույցներ, հայտարարություններ Լիսկայի եւ նրա բանդայի հեղինակած հանցագործությունների վերաբերյալ, որոնք ճչացող ապացույցներ են, բայց մինչեւ հիմա իմ հրապարակումների հիման վրա քրեական գործ չի հարուցվել: Ինքս նաեւ զանգահարել եմ գլխավոր դատախազություն, ՀՔԾ, զրուցել հասարակայնության հետ կապերի վարչության ներկայացուցիչների հետ, նրանք ասել են` գրավոր դիմեք»»:
ՀՔԾ մամուլի խոսնակ Միքայել Ահարոնյանը AraratNews.am-ի հետ զրույցում հաստատեց, որ ՀՔԾ պետը ստացել է նման դիմում.«Այո, մենք ստացել ենք նման դիմում և այժմ այն քննվում է»,-ասաց Միքայել Ահարոնյանը:
Հետաքրքիր է այն հանգամանքը, որ այս օրերին մամուլում ակտիվ խոսակցություններ են շրջանառվում, որ իշխանությունները վերջնական որոշում են կայացրել և «պատժելու» են Սյունիքի նախկին մարզպետին:
