Սահմանամերձ համայնքներում լուծում ստացած ցանկացած խնդիր ավելի է ամրացնում Հայրենիքը: Յուրաքանչյուր լուծված հարց խթանում է գյուղական տնտեսությունների զարգացումն ու ընդլայնումը: Սահմանամերձ համայնքներում ապրողների խնդիրների լուծումը խոսում է մեր երկրում լրջագույն փոփոխությունների մասին:
Ընդամենը մեկ շաբաթ առաջ ահազանգ ստացանք Տավուշի մարզի Բարեկամավան գյուղից: Գյուղացիները հայտնում էին, որ գյուղն ունի ջրի խնդիր:
Ինչպես արդեն հայտնել էինք, բարեկամավանցիների ջրի խնդրի հարցով զրուցել էինք Տավուշի մարզպետ Հայկ Չոբանյանի հետ:
Մարզպետը հավաստիացրել էր, որ ամենակարճ ժամկետներում կլուծվի սահմանամերձ Բարեկամավան համայնքի ջրի խնդիրը:
Հայկ Չոբանյանը նույնպես կարևորում էր թշնամիներով շրջապատված համայնքում խնդրի շուտափույթ լուծումը, քանի որ սահմանամերձ բնակավայրերը մեր երկիրը անառիկ պահող ամրոցներն են:
Եվ, հուրախություն բոլորիս, մարզպետի հետ զրույցից ընդամենը մի քանի օր հետո Բարեկամավանի բնակիչներից մեկը տեղեկացրեց, որ վերջապես գյուղում կենսական նշանակություն ունեցող ջրի խնդիրը լուծում ստացավ:
Բարեկամավանում ջրի խնդիրը լուծվեց, և այս փաստն արձանագրում է, որ մենք ապրում ենք ժողովրդավար երկրում, որտեղ պաշտոն ստացած անձը ծառայում է Հայրենիքին:
Հայրենիքը սկսվում է սահմանից: Սակավամարդ Բարեկամավանում ջրի խնդիր չկա: Եվ գյուղում ապրողները կարող են հանգիստ ապրել, շենացնել իրենց գյուղը և ավելի ամուր կառչել մայր հողից:
Հայկ Մագոյան
