Հայաստանում Ռուսաստանի Դաշնության դեսպան Սերգեյ Կոպիրկինը հայտարարել է, որ Ազգային ժողովի նախկին պատգամավոր, Դատական ակտերի հարկադիր կատարման ծառայության նախկին պետ Միհրան Պողոսյանը, որի նկատմամբ Հայաստանում հետախուզում է հայտարարված, Ռուսաստանում քաղաքական ապաստան չի ստացել:
Դեսպանը նշել է, թե հակված չէ ենթատեքստ տեսնել այն բանում, որ Հայաստանի մի շարք բարձրաստիճան պաշտոնյաներ թաքնվում են քննությունից ՌԴ տարածքում:
«Ասացեք, դուք որտեղ եք տեսնում նման միտում: Ես չեմ տեսնում: Եթե մարդը Ռուսաստանում է, չի նշանակում, որ նա ստացել է քաղաքական ապաստան: Ինչ վերաբերում է Պողոսյանին, ապա ըստ իմ տեղեկությունների, խոսքն իրավական գործընթացների մասին է` անհրաժեշտ փաստաթղթերի տրամադրման մասին»,- ասել է Կոպիրկինը՝ պատասխանելով Միհրան Պողոսյանի և պաշտպանության նախկին նախարար Միքայել Հարությունյանի մասին հարցին, որը նույնպես գտնվում է Ռուսաստանում:
«Ոչ մի միտում կամ ուղերձ ես չեմ տեսնում: Հայաստանի նոր իշխանություններին ուղերձը հստակ է. մենք ռազմավարական դաշնակիցներ ու գործընկերներ ենք, եղբայրական ժողովուրդներ և երկրներ: Ռուսաստանի դիրքորոշումը այս հաշվով ոչ մի կերպ չի փոխվել: Որքան ես եմ հասկանում, սա համապատասխանում է նաև Հայաստանի ղեկավարության դիրքորոշմանը»,- ընդգծել է Ռուսաստանի դեսպանը:
