Ռուսաստանի Դաշնությունն անարդար է համարում արևմտյան որոշ շրջանակների` իբրև Ժնևում Իրանի և «վեցյակի» բանակցությունների հնարավոր ձախողումների հիմնական պատասխանատու իրանական կողմին ներկայացնելու փորձերը: Այս մասին հայտարարել է ՌԴ փոխարտգործնախարար Սերգեյ Ռյաբկովը:
«ՌԴ-ն մտահոգված է ժնևյան բանակցությունների միակողմանի լուսաբանումից, որը տեղի է ունենում արևմտյան լրատվամիջոցներում: Տպավորություն է ստեղծվում, որ արևմտյան պատվիրակություններում անանուն աղբյուրներն ամեն ինչ անում են, որպեսզի բանակցություններում առաջընթացի հնարավոր բացակայության պատասխանատվությունը դնեն իրանական կողմի վրա»,- ասել է դիվանագետը:
Հիշեցնենք, որ այսօր Ժնևում ընթանում են Իրանի միջուկային ծրագրի շուրջ բանակցությունները, որտեղ սպասվում է Իրանի և «վեցյակի» միջև համաձայանագրի ստորագրում:
