ՌԴ խորհրդի միջազգային գործերով կոմիտեի ղեկավար Կոնստանտին Կոսաչովը մեկնաբանել է ՀՀ վարչապետ Նիկոլ Փաշինյանի այն հայտարարությունը, ըստ որի՝ ԼՂ հակամարտության կարգավորումը պետք է գոհացնի թե՛ Հայաստանի, թե՛ Արցախի և թե՛ Ադրբջանի ժողովրդի շահերը:
Ռուսաստանցի պաշտոնյան Երևանում հայտարարել է, թե ռուսական կողմը կարևորում է Փաշինյանի այդ մոտեցումը: Միաժամանակ Կոսաչովն ափսոսանք է հայտնել, որ Բաքուն համանման հայտարարությամբ հանդես չի եկել: Ըստ նրա՝ փոխադարձ հայտարարությունները կարող են նպաստել հակամարտության կարգավորմանը:
Հավելենք, որ այսօր՝ դեկտեմբերի 18-ին, Երևանում կայացել է ՀՀ ԱԺ արտաքին հարաբերությունների մշտական հանձնաժողովի և ՌԴ Դաշնային ժողովի Դաշնության խորհրդի միջազգային գործերով կոմիտեի համատեղ նիստը:
