Ինչպես ավելի վաղ նշել էինք, այսօր ԱԺ-ում քննարկվում է «ՀՀ 2013թ. պետական բյուջեի կատարման մասին» տարեկան հաշվետվությունը: Հենց այդ քննարկման ժամանակ ԱԺ պատգամավոր Նիկոլ Փաշինյանն ասել է, որ 2013 թվականը աննախադեպ տարի է եղել արտաքին պարտքի համար՝ 861 մլն դոլար, այն դեպքում, երբ 2012-ի ն եղել է 139 մլն, 2011-ին՝ 101 մլն։
«Ինչքանո՞վ է նպատակահարմար նման պիկը, չարժի՞ բանակցել պարտքի սպասարկման հարցում, որ ավելի սահուն լինի։ Հարթ գրաֆիկն ավելի օգտակար չէ՞ տնտեսության համար և կտրուկ վերելքները վնաս չե՞ն տնտեսությանը»,- հարցրել է պատգամավորը: Նիկոլ Փաշինյանը նաև նշել է, որ պարտքի նման մի պիկ սպասվում է նաև 2020 թվականին։
«Մեծ տատանումը կապված է սպառման հետ։ 2019-20թթ. որոշակի պիկ ունենք, բայց մեր արտաքին ռեզերվների կառուցվածքը, արտաքին պահուստների կառուցվածքը համահունչ են պարտքի կառուցվածքին, թե՛ արտարժույթի տեսակարար կշիռներում, թե՛ ժամկետների հարցում։ Բոլոր տիպի պիկերը հաշվի ենք առնում»,- պատասխանել է Կենտրոնական բանկի նախագահ Արթուր Ջավադյանը։
Նիկոլ Փաշինյանի հարցին անդրադառնալովˋ Ֆինանսների նախարարի տեղակալ Ատոմ Ջանջուղազյանը նշել է, որ հարցը վերաբերում է կառավարությանը, ոչ թե ԿԲ-ին, որից հետո շարունակել է. «Մենք ստանձնել ենք վաղաժամ մարում։ 10 տարվա ընթացքում պետք է մարել ռուսական վարկը։ Իսկ իրականացվել է մարումն ի հաշիվ մեկ այլ արտաքին պարտքի, բայց ոչ պարտքի տեսքով, այլ արտաքին շուկայում պետական պարտատոմսերի վաճառքով: Ահա թե ինչու է այդքան մեծ ստացվել 2013 թվականի պարտքուժի սպասարկման թիմը»։
Ի պատասխան հնչած պատասխաններիˋ Նիկոլ Փաշինյանն արձագանքեց, թե պատասխանն իրեն հիշեցրեց Պարույր Սևակի «Առաջադրանք բոլոր հաշվիչ մեքենաներին» բանաստեղծությունը։ «Հասկացանք, որ կայացվել է քաղաքական որոշում, և արտաքին պարտքի սպասարկման բարդությունները քցվել են 2020թ-ի վրա։ Փաստորեն, պարոն Ջավադյանի պատասխանն ավելի հասկանալի էր: Ասաց, որ եթե այսպես չանեինք, պիկը կլիներ 2014- 2015թթ-ը։ Եթե ճիշտ հասկացա, պետությունն առաջնորդվում է «ինձնից հետո թեկուզ ջրհեղեղ» սկզբունքով։ Չեմ կարծում, որ այսօրվա իշխանությունները կլինեն իշխանության 2020 թվականին, և սրանով որոշվել է պարտքը հեռացնել, որ բարդություն չլինի»,- եզրափակել է Փաշինյանը։
