Օրերս Գագիկ Շամշյանը տեղեկացրել էր, որ մի շարք քաղաքացիական շարժումների անդամ Կարեն Հարությունյանը վթարի է ենթարկվել: Araratnews.am-ի թղթակցի զրույցում Կարեն Հարությունյանը փաստեց, որ տեղեկատվությունը համապատասխանում է իրականությանը. «Այո ես վթարի եմ ենթարկվել մի քանի օր առաջ իմ մոտոցիկլետով, բայց Շամշյանը ուշացած է տվել լուրը։ Տրված լուրը շատ կցկտուր է և անհասկանալի։ Ես երթևեկել եմ Ամիրյան փողոցով` գլխավոր ճանապարհով, Զաքյան խաչմերուկում մի մեքենա ինձ չզիջեց, ես չհասցրեցի արգելակել և ընդհարվեցի խաչմերուկի մեջտեղում փաստացի կանգնած մեքենային։ Չգիտեմ, թե ինչու են հատկապես նշել, որ կանգնած մեքենայի եմ ընդհարվել, և առանց մանրամասների, թե որտեղ և ինչ հանգամանքներում էր մեքենան կանգնած։ Վթարից անմիջապես հետո, քաղաքացիներ հավաքվեցին և փորձեցին օգնություն ցույց տալ, նաև զանգել էին շտապ օգնություն և ինձ տեղափոխեցին հիվանդանոց բուժզննման»:
Կարեն Հարությունյանի վիճակը ներկայումս լավ է` լուրջ վնասվածքներ, կոտրվածքներ չունի. «Կան սալջարդեր և քերծվածքներ, հիմնականում մի ոտքս։ Բայց արդեն ապաքինվում եմ»։
