Ուրմիա լճի վերականգնումը կարող է տևել 10-15 տարի: Այս մասին հայտարարել է Իրանի էներգետիկայի նախարար Համիդ Չիտչյանը: Հաղորդում է Mehr News-ը:
«Քաղաքական և գովազդային հայտարարությունները, որոնք վերաբերում են Ուրմիա լճի վերականգնմանը, իրատեսական չեն, դրանք դատարկ խոստումներ են: Դա անարդարացի է մարդկանց նկատմամբ»,- ասել է նախարարը, ով ակնարկել է Ուրմիայի մակարդակի արագ բարձրացման որոշ քաղաքական գործիչների հայտարարությունները:
Նրա խոսքերով` չվերահսկվող գյուղատնտեսական գործողությունը Ուրմիայի չորանալու հիմնական պատճառներից է: Նա հավելել է, որ եթե գյուղատնտեսական նպատակներով ջրի օգտագործումը հնարավոր չլինի վերականգնել, ապա Ուրմիան երբեք չի վերականգնվի: Նա նշել է, որ վերջին տարիների ընթացքում Ուրմիա լճի մերձակա տարածությունները, որոնք օգտագործվում են գյուղատնտեսական նպատակերով, 150 հազար հեկտարից հասել են 480 հազարի: Բացի այդ, Ուրմիայի մակարդակի նվազմանը նպաստում է շոգ եղանակը:
Համիդ Չիտչյանը հայտարարել է, որ Ուրմիան փրկելու համար տարեկան պետք է 3,1 մլրդ խորանարդ մետր ջուր: Այս պահին Ուրմիայի յուրաքանչյուր լիտր ջրին բաժին է հասնում 330 գրամ աղ, մինչդեռ տարիներ առաջ այդ ցուցանիշը կազմում էր 160-170 գրամ:
