Հոկտեմբերի 27-ի ահաբեկչության գլխավոր կատարող Նաիրի Հունանյանը դիմում է ներկայացրել պայմանական վաղաժամկետ ազատ արձակման համար։ Այս մասին Araratnews.am-ին տեղեկացրին ՀՀ ԱՆ քրեակատարողական ծառայության հանրային կապերից:
Հունանյանի դիմումին կպատասխանեն 80-օրյա ժամկետում:
Նաիրի Հունանյանը դիմումը ներկայացրել է սեպտեմբերի 11-ին։
Հիշեցնենք՝ 1999 թվականի հոկտեմբերի 27-ին, 5 հոգուց բաղկացած ահաբեկչական խումբը՝ Նաիրի Հունանյանի գլխավորությամբ, զինված ինքնաձիգներով, մտել է խորհրդարանի նիստերի դահլիճ եւ գնդակահարել ԱԺ նախագահ Կարեն Դեմիրճյանին, վարչապետ Վազգեն Սարգսյանին, եւս 6 բարձրաստիճան պաշտոնյաների ու պատգամավորների:
Պատգամավորները մեկ օր շարունակ պատանդ էին մնացել խորհրդարանի դահլիճում, որից հետո ահաբեկիչները հանձնվել են իրավապահ մարմիններին: Դատավարությունը տեւել է երեք տարի: 5 ահաբեկիչ դատապարտվել է ցմահ ազատազրկման: Հոկտեմբերի 27-ի պատվիրատուներն այդպես էլ չեն հայտնաբերվել:
