Յացենյուկ․ Եթե չեք պաշտպանում միջուկային զենքից հրաժարված Ուկրաինային, ապա ինչպե՞ս եք մյուսներին համոզելու հրաժարվել միջուկային ծրագրից

Ուկրաինայի վարչապետ Արսենի Յացենյուկը ԱՄՆ արտաքին հարաբերությունների հարցերով փորձագետներին զգգուշացրել է, որ Ուկրաինային պաշտպանելուց Արևմուտքի հրաժարումը կարող է լուրջ հետևանքներ ունենալ նախկին ԽՍՀՄ տարածքից դուրս անվտանգության համակարգում։ Այս մասին հաղորդում է The Wall Street Journal-ը։

Ուկրաինայի վարչապետի հայտարարությունը հնչել է ԱՄՆ կատարած այցի ժամանակ Ատլանտյան խորհրդի հետ հանդիպման ժամանակ։ Յացենյուկը ներկաներին կրկին հիշեցրել է 1994 թվականին Բուդապեշտում ստորագրված հուշագրի մասին, որով Ուկրաինան հրաժարվել էր միջուկային զենքից, իսկ ԱՄՆ-ն, Մեծ Բրիտանիան և Ռուսաստանը պարտավորվել էին ապահովել այդ երկրի անվտանգությունը։ «Մենք ստորագրել ենք այդ հուշագրի տակ և հիմա այդ պաշտպանության կարիքն ունենք։ Եթե մենք այն չստանանք, ինչպե՞ս է աշխարհը խնդրելու մյուս պետություններին՝ հրաժարվել միջուկային ծրագրերից», — եզրակացրել է Յացենյուկը։

Հիշեցնենք, որ երեկ Յացենյուկի հետ հանդիպման ժամանակ Օբաման կրկին զգուշացրել է Պուտինին, որ ՌԴ-ն թանկ է վճարելու Ղրիմի բռնազավթման համար։