Լեռնային Ղարաբաղի և Ադրբեջանի զինված ուժերի շփման գծի Հադրութի ուղղությամբ հինգշաբթի նախատեսված ԵԱՀԿ-ի առաքելության պլանային դիտարկման ժամանակ ադրբեջանական կողմից Ղարաբաղի պաշտպանության բանակի դիրքերի ուղղությամբ ավտոմատ զենքից արձակված կրակոցները, որոնց պատճառով ընդհատվել էր դիտարկումը, ըստ «Մոդուս Վիվենդի» կենտրոնի տնօրենի՝ ավելի շատ ուղղված էին Ռուսաստանին, որի հետ Ադրբեջանի հարաբերությունները սրվել են հատկապես օրեր առաջ Մոսկվայում տեղի ունեցած սպանությունից հետո, որում մեղադրվում է ադրբեջանցի ներգաղթյալ:Դիտարկման ընդհատման վերաբերյալ հինգշաբթի ԵԱՀԿ-ի համանախագահները հայտարարություն էին տարածել, որում ասվում է, որ «երկու կողմերից ստանալով ԵԱՀԿ-ի առաքելության անվտանգության հարցում երաշխավորություն՝ վերջիններս եղել են շփման գծում և կրակոցներ են լսել: Անհնար է եղել որոշել, թե ո՛ր կողմից է եղել կրակոցի ձայնը, և, անվտանգության նկատառումներից ելնելով, ԵԱՀԿ-ի գործող նախագահի անձնական ներկայացուցիչը որոշել է հետաձգել դիտարկումը»:Քաղաքագետ Տիգրան Աբրահամյանը համանախագահների այս հայտարարությունը որակում է «վտանգավոր, քանի որ այն ոչ միայն կանխարգելիչ գործառույթ չունի, այլև մեծ առումով նպաստում է նմանատիպ միջադեպերի կրկնությանը, ինչը չի բացառում նաև հետագայում արձակված կրակոցի ոչ թե «զգուշացնող», այլ «խոցող» նպատակների հնարավորությունը»:
«Համանախագահների այս հայտարարությունից պարզ է դառնում, որ միջնորդները, չցանկանալով շեղվել «սահմանված գծից», կրկին ընդհանուր բնույթի հայտարարություն են անում, ինչը կանաչ լույս է Ադրբեջանին հետագայում ևս նման սադրանքների դիմելու համար»,- ասում է Աբրահամյանը:
Վերջին երկու տասնամյակների ընթացքում Ադրբեջանի հետ Ղարաբաղի և Հայաստանի սահմանամերձ գոտիներում ԵԱՀԿ-ի դիտորդական առաքելության մեծ մասն անցել է առանց միջադեպերի, և այս դեպքը, ըստ «Մոդուս Վիվենդի» կենտրոնի տնօրեն, քաղաքագետ Արա Պապյանի, պայմանավորված է ընդհանուր ռազմատենչ մթնոլորտով, որն օր օրի աճում է Ադրբեջանում ռուսներից գնվող նոր զենքի խմբաքանակի պատճառով, ինչպես նաև Ադրբեջանում տիրող ներքին լարվածությունը կոծկելու նպատակով:
«Այս դեպքն ավելի շատ արտացոլում է Ռուսաստանի և Ադրբեջանի վերջին օրերի սրված հարաբերությունները, քանի որ ԵԱՀԿ-ի այս կազմում կան նաև ռուսներ, և այս առումով մեսիջն ավելի շատ Ռուսաստանի, քան եռյակի դեմ է»,- «ԱրմենիաՆաուին» ասել է Պապյանը:
Անցյալ շաբաթավերջին Մոսկվայի հարավում գտնվող Արևմտյան Բիրյուլյովո շրջանի բանջարեղենի բազայում անկարգություններ սկսվեցին, երբ հոկտեմբերի 10-ի գիշերն ընկերուհու համար տեղի ունեցած վիճաբանության ժամանակ, ըստ նախնական տվյալների` ներգաղթյալ ադրբեջանցին դանակահարել էր 25-ամյա մոսկվայաբնակ Եգոր Շչերբակովին: Օրեր առաջ Ռուսաստանում Ադրբեջանի արտակարգ և լիազոր դեսպան Փոլադ Բյուլբյուլօղլին ռուսաստանյան «Դոժդ» հեռուստաալիքի հետ հարցազրույցում ասել է, որ Ադրբեջանի դեսպանությունը մտադիր է Ռուսաստանի արտգործնախարարությանը նոտա հղել` Շչերբակովի սպանության մեջ կասկածվող ադրբեջանցի Օրհան Զեյնալովի և Ադրբեջանի դեսպանատան աշխատակիցների հանդիպման պահանջով:
