Մենք հաղթել ենք ընդամենը մի ճակատամարտ.Ալեն Սիմոնյան

Այսօր լրանում է մեկ տարին, երբ Երևանի քաղաքապետ Տարոն Մարգարյանի ապօրինի որոշմամբ Երևանում տրանսպորտի ուղեվարձը թանկացավ 100 դրամով:

Երևանում սկսվեց  համազգային շարժում՝ »Վճարում ենք 100 դրամ» նշանաբանով:

Araratnews_ը ներկայացնում է հարցազրույց Քաղաքացիական պայմանագրի անդամ, Ararat մեդիա գրուպի գլխավոր խմբագիր Ալեն Սիմոնյանի հետ:

-Շարժումը սկսվեց անվճար փոխադրումներից՝ Free car ակցիայից: Դուք, որպես այդ ակցիայի նախաձեռնողներից մեկը, կներկայացնեք, թե ինչպե՞ս որոշվեց անցկացնել ակցիան:

-Ակցիայի միտքը ծագեց ընկերոջս՝ դերասան Հայկ Մարությանի մոտ: Առավոտյան զանգեց, հանդիպեցինք, որոշեցինք անել, ու արեցինք: Արձագանքն անսպասելի էր: Շարժումն աննախադեպ էր, որովհետև առաջին հերթին քաղաքացին հնարավորություն ուներ պասիվ ձևով, տեղում իր վերաբերմունքը ցույց տալ ակցիային՝ չվճարելով 150 դրամ: Երկրորդ փաստը հասարակական լայն հնչեղությունն էր, առանց որի, կարծում եմ, այս արդյունքը չէինք ունենա:

-Ի՞նչ արդյունք տվեց շարժումը:

-Առաջինը «այ մարդ, մեկ ա բան չի փոխվելու» մտածելակերպի , կարծրատիպի կոտրելն էր: Կարծում եմ՝  ստացվեց: Բայց սա «հաղթանակ» կոչելը մեծ հաշվով սխալ է: Մենք ճակատամարտ ենք հաղթել, բայց պատերազմը դեռ շարունակվում է, ու գլխավոր ճակատամարտերն առջևում են:

-Եթե շարժումը քաղաքականացվեր, ի՞նչ ընթացք կունենար:

-Շարժումը քաղաքական չէր, բայց կարող էր ու պետք է վերածվեր քաղաքական պայքարի: Կարծում եմ իշխանությունները ևս ունեցան այդ վախը: