Ինչպես արդեն հայտնի է դեռևս մարտի 1-ին Հայաստանում հաստատվեց կորոնավիրուսով վարակման առաջին դեպքը, որից անմիջապես հետո ձեռնարկվեցին տարբեր միջոցառումներ. այդ թվում՝ ուսումնական հաստատություններում և մանկապարտեզներում դասապրոցեսները դադարեցնելու մասին որոշում կայացվեց:
ՀՀ առողջապահության նախարարության մամլո խոսնակ Ալինա Նիկողոսյանի հետ զրույցում Araratnews.am-ը հետաքրքրվեց, թե ինչպե՞ս է իրեն զգում կորոնավիրուսով վարակված ՀՀ, թերևս, միակ քաղաքացինին և արդյոք մինչեւ այժմ կան կորոնավիրուսով վարակման նոր դեպքեր:
Ինչ վերաբերում է Ծաղկաձորի «Գոլդեն Փելիս» հյուրանոցում մեկուսացման մեջ գտնվող քաղաքացիներին, գերատեսչության խոսնակը պատասխանեց.
«Քաղաքացին իրեն լավ է զգում, գանգատներ չունի: Կրկնակի թեստ կդրվի, որից հետո, եթե վիրուսը բացառվի, դուրս կգրվի: Կորոնավիրուսով նոր վարակվածներ չկան: Իսկ Ծաղկաձորում գտնվող «Գոլդեն Փելիս» հյուրանոցում մեկուսացման մեջ գտնվող քաղաքացիները նույնպես իրնեց լավ են զգում, կրկնակի թեստավորումից հետո, եթե ամեն ինչ լավ լինի, մինչև շաբաթվա վերջ դուրս կգրվեն»,-նշել է նա:
Նշենք, որ մինչ օրս Հայաստանում իրականացվել է 211 հետազոտություն՝ 1 դրական արդյունքով:
ՀՀ տարբեր գերատեսչություններ և մասնավորապես ՀՀ ԱԳՆ-ն կոչ են արել խուսափել ռիսկային ուղղություններով ուղևորվելուց:
