Այսօր առավոտյան ժամերին մայրաքաղաքում դարձյալ խցանումներ էին, ու պատճառը դարձյալ արդեն ավանդական դարձած ասֆալտապատման աշխատանքներն են:
Այս անգամ խցանվելու հերթը Մալաթիա-Սեբաստիա համայնքի հետ կապող գլխավոր ավտոճանապարհներինն էր:
Երևանում ասֆալտապատման աշխատանքների ու դրանց հետևանքով առաջացող խցանումների հարցը հավերժ անլուծելիների թվում է: Հատկապես, որ դրանց հետևանքով քիչ չեն նաև տրանսպորտային պատահարներն ու վթարները:
Սեպտեմբերի 19-ին ասֆալտապատման աշխատանքների և դրանց հետևանքով տեղի ունեցած ավտովթարներից առաջացած խոշոր խցանման մեջ, ըստ մամուլի, մնացել էին նաև միջոցառման շտապով Երևանի քաղաքապետ Տարոն Մարգարյանն ու մայրաքաղաքի վարչական շրջանների ղեկավարները:
Այս միջադեպից հետո լուրեր տարածվեցին, թե Տարոն Մարգարյանը հրահանգել է այսուհետ ասֆալտապատման աշխատանքներն իրականացնել միայն հանգստյան օրերին:
Քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը, «Փաստինֆո»-ին հայտնեց, որ Տարոն Մարգարյանը նման հայտարարություն չի արել: Ինչ վերաբերում է ասֆալտապատումն այնպես կազմակերպելուն, որ այն չխանգարի երթևեկությանը, մեր զրուցակիցը վստահեցրեց, որ քաղաքապետարանում անում են հնարավորը, ծանրաբեռնված ժամերին երթևեկության համար լրացուցիչ խոչընդոտներ չառաջացնելու համար:
Ի դեպ, աշխարհում ընդունված է ճանապարհների նորոգման աշխատանքները հատկապես գիշերային ժամերին կատարելու տարբերակը, ինչը քաղաքային իշխանություններին ազատում է հավելյալ գլխացավանքից: Մեր քաղաքապետարանը, սակայն, նման ճոխություն իրեն առայժմ չի կարող թույլ տալ:
Գիշերային ժամերին աշխատելու համար, նախ հարկ կլինի լուսավորության խնդիր լուծել, ասենք, ձեռք բերել հզոր լուսարձակներ: Մյուս կողմից շինտեխնիկայի գիշերային աշխատանքը կխանգարի նաև երևանցիների հանգիստը:
Այս պարագայում երևանցիներիս մնում է համակերպվել խցանումների մեջ կորցրած ժամանակի և նյարդերի փաստին ու մխիթարվել բարեկարգ փողոցներ ունենալու հեռանկարով:
