Գեղեցիկ եւ ինքնատիպ հագուկապի կարեւորագույն բաղադրիչ կոշիկների հայ վարպետ Մամիկ Մալխասյանը, որի յուրօրինակ աշխատանքները նախընտրում են տարբեր երկրների առաջին դեմքերն ու հանրահայտ աստղերը, այլեւս ապրում եւ աշխատում է Եվրոպայում: Կոշիկի դիզայները BRAVO.am-ի հետ զրույցում պատմել է գործնական վերջին նորությունների մասին եւ ոչ միայն:
-Մամիկ, տեւական ժամանակ է` քո արվեստով հետաքրքրվող մարդիկ ոչինչ չեն լսել գործունեությանդ մասին, պասիվ է նաեւ “Մամիկ” բրենդի “ֆեյսբուքյան” պաշտոնական էջը: Ի՞նչն է պատճառը:
-Անկեղծ ասած, ե̒՛ւ դադար էր, ե̒՛ւ կապված է իմ` Հայաստանից հեռանալու հետ: Իսկ սոցիալական ցանցերում պասիվությունս նորություն չէ. միշտ էլ անսպասելի կերպով “ջնջում” եմ ընկերներիս, մեկուսանում եւ սկսում հանգստանալ ամեն ինչից:
-Ո՞րն է երկրից հեռանալուդ պատճառը եւ որտե՞ղ ես բնակվում:
-Շատ եմ սիրում իմ հայրենիքը, բայց այն ինձ չսիրեց: Ես հեռացա իմ երկրից տխուր ու միայնակ, նեղացած եմ իմ հայրենիքից, բայց այդ մասին խոսել չեմ ցանկանում: Սկզբում Թբիլիսիում էի, հետո Կիեւում, այժմ ապրում եմ Իտալիայում` Վերոնա քաղաքում:
