Նիդերլանդների հյուսիսում գտնվող Հոլվերսում քաղաքի քաղաքապետ Պիտեր Բրյորտյեսը կոչ էր արել արտաքսել Ռուսաստանի նախագահ Վլադիմիր Պուտինի աղջկան՝ Մարիային, ով ենթադրաբար բնակվում է Նիդերլանդներում: Ավելի ուշ, սակայն, պաշտոնյան ներողություն է խնդրել իր խոսքերի համար:
Պուտինի 29-ամյա աղջկան արտաքսել Բրյորտյեսն առաջարկել էր այսօր տեղական ռադիոկայաններից մեկին տված հարցազրույցի ժամանակ: Այս մասին տեղեկացնում է The Guardian-ը: Ենթադրվում է, որ Մարիա Պուտինան ապրում է Նիդերլանդների հարավում գտնվող Վորսհոթեն քաղաքում: Նրա ամուսինը Նիդերլանդների քաղաքացի է:
Ավելի ուշ, սակայն, հոլանդացի պաշտոնյան ներողություն էր խնդրել Twitter-ի իր էջում և նշել, որ «այդքան էլ իմաստուն» չի արտահայտվել: Նրա խոսքերով՝ դա պայմանավորված էր իր «անօգնականության զգացմամբ, որ շատերը կիսում են» Boeing 777-ի կործանումից հետո:
