Araratnews.am-ը զրուցել է Կապանի քաղաքապետ Աշոտ Հայրապետյանի հետ: Զրույցի ընթացքում անդրադարձել ենք քաղաքի խնդիրներին ու հետագա անելիքների մասին:
— Պարոն Հայրապետյան, Ձեր պաշտոնավարման ընթացքում ի՞նչ խնդիրներ եք կարողացել լուծել և ի՞նչ խնդիրներ դեռ կան:
— Քաղաքի համար կարևոր խնդրներ շատ կան: Բայց առաջին հերթին ուզում էի թե ես` որպես քաղաքապետ, թե այս կառույցը, ավելի բաց լինենք հասարակության հետ շփման մեջ: Հնարավորինս փորձենք ներգրավել հասարակությանը համայնքային խնդիրների լուծման հարցում, մեր ծրագրերի իրականացման մեջ: Նախընտրական ծրագիրը կազմելիս շատ զգույշ ենք լինում, որովհետև դրանք կապված են ֆինանսական միջոցների առկայության հետ ու պետք է համոզված լինել դրանց իրականացման հարցում, նոր ներկայացնել հասարակությանը, որովհետև դա ցավոտ խնդիր է մեզ համար:
-Իսկ կա՞ պատրաստակամություն բնակիչների շրջանում:
— Օգնություն հասկացողությունը մի քիչ լայն իմաստ ունի: Եթե խոսքը գնում է նյութական օգնության մասին, ապա մեր քաղաքացիներն այդքան էլ լավ ֆինանսական վիճակում չեն, իսկ ինչ վերաբերում է օգնության այն տեսակները, որոնք ես եմ ենթադրում, այո, կան: Կան կազմակերպություններ, անհատներ, որոնք սրտացավ են և առաջին իսկ խնդրանքի դեպքում փորձում են օգտակար լինել: Կան հասարակական կազմակերպություններ, երիտասարդական շարժումներ, որոնց հետ համագործակցում ենք ու արդյունքներ իսկապես, կան:
— Քաղաքի կենտրոնում հիմա շինարարություն է ընթանում: Ի՞նչ է նախատեսվում կառուցել այդ վայրում:
— Եթե նկատել եք, վերակառուցվում է Մշակույթի կենտրոնի շենքի ճակատային մասը: Միևնույն ժամանակ, բարձրացվում է շենքի սեյսմակայությունը, իսկ հարակից տարածքում կառուցվում են երգող շատրվաններ:
— Երիտասարդների համար ի՞նչ հետաքրքրություններ կան այստեղ: Ընդհանրապես երիտասարդության հոսք դեպի ծննդավայր զգո՞ւմ եք:
— Եթե խոսքը բնակավայրի մասին է, ապա` ոչ: Բայց կարող եմ ասել, որ եթե նախկինում մեր երիտասարդները նախընտրում էին իրենց ամառային հանգիստը վայելել դրսում, ապա հիմա ձգտում են գալ Կապան: Մի շարք միջոցառումներ ենք իրականացնում այստեղ հավաքված երիտասարդների հետ: Այդ մեկ-երկու ամսվա ընթացքում, որ նրանք այստեղ են անցկացնում, ձգտում ենք համախմբել նրանց ինչ-որ բանի շուրջ: Դրանցից է «Ուսանողական ամառ» ծրագիրը: Իհարկե, երիտասարդների շրջանում ևս ակտիվություն նկատվում է: Իրենք են նախաձեռնում, իրենք են հարցեր բարձրացնում ու փորձում լուծումները գտնել:
-Սյունիքը հայտնի է հանքարդյունաբերական ձեռնարկություններով, որոնք շրջակա միջավայրին ու բնակչության առողջությանը վնաս հասցնելու հետ մեկտեղ նաև բազմաթիվ աշխատատեղեր են ստեղծում: Ինչպե՞ս եք կարողանում նվազագույնի հասցնել այդ վնասը` միաժանամանակ չկրճատել զբաղվածության մակարդակը:
— Մենք միշտ մտահոգ ենք եղել ձեր ասած խնդիրներով: Ես բազմիցս ասել եմ, որ հանքարդյունաբերությունը պիտի լինի հնարավորինս անվտանգ: Բոլորս ենք շահագրգռված դրանում: Ես կասեի` առաջին հերթին պետք է շահագրգռված լինեն հենց հանքարդյունահանող ընկերությունները, քանի որ դրանով է պայմանավորված նրանց զարգացումը, աճը: Շահույթ հետապնդող ընկերություններ են, բնականաբար, պետք է իրենք էլ իրենց հերթին այդ պատասխանատվությունը կրեն: Մյուս կողմից, իհարկե, նրանք բազմաթիվ աշխատատեղեր են ստեղծել, այդ ձեռնարկություններում մեծ թվով մարդիկ են աշխատում: Բացի այդ, բավական մեծ թվով մարդիկ էլ աշխատում են այդ ընկերությունների սպասարկման բաժիններում: Այսինքն` կան ՀԿ-ներ, որոնց հետ աշխատում են այս ձեռնարկությունները: Իհարկե, այդ ամենը պետք է բալանսի մեջ լինի: Առաջին հերթին հենց մարդկանց առողջությունը, հանքերի շահագործման մակարդակը: Բնականաբար, այդ ամենով մենք մտահոգված ենք: Բնականաբար, մեր խնդիրներն այնքան շատ են, որ համարել, որ կարճ ժամանակում կարող են այդ ընկերությունների միջոցով իրականացնել, մի քիչ վերացական կլինի: Փորձում են, իհարկե փորձում են, բայց այն, որ մեր ցանկությունը դրա հետ մեկտեղ մեծ է, որ իրենք շատ բան պիտի անեն, դա է փաստը: Չեմ փորձի գնահատական տալ, թե ինչքանով են բավարար անում, որովհետև, կրկնում եմ, անելիքները շատ են:
— Բոլորիս քաջ հայտնի են բնությունից որևէ կերպ չզատված պոչամբարները Կապանի հարակից համայնքների տարածում: Քաղաքապետարանն իր առաջիկա ծրագրերում ունի՞ արդյոք գոնե այս առաջնային խնդիրը լուծելու ծրագիր:
— Թեև այդ պոչամբարները Կապանի վարչական տարածքում չեն գտնվում, բայց այդ խնդիրը, բնականաբար, մեզ ևս մտահոգում է: Բայց, ցավոք, պետական մարմիններից նման պահանջ չկա: Այն կառույցները, որոնք տալիս են շահագործման լիցենզիա այդ ձեռնարկություններին, բնականաբար պետք է մտահոգված լինեին խնդիրներով:
— Բնակիչներն այստեղ հիմնականում ինչո՞վ են զբաղված:
-Բնակչության աշխատունակ հատվածն աշխատում է հանքարդյունաբերության մեջ, բայց զբաղվածության խնդիրն այստեղ շատ լուրջ է: Միջին հանրապետական ցուցանիշի համեմատությամբ` նախորդ տարի մեր գործազրկության ցուցանիշը գերազանցում էր 1.9 անգամ: Սա բավական բարձր է:
-Կապանից արտագողթողները շա՞տ են:
-Հիմնականում գնում են արտագնա աշխատանքների, բայց եթե դրանք պարբերական բնույթ են կրում, ժամանակի ընթացքում նաև այդ մարդիկ իրենց բնակչության վայրն են փոխում:
— Որպես ռազմավարական կարևոր նշանակություն ունեցող քաղաք, պետությունից ինչ-որ հատուկ ուշադրություն զգո՞ւմ եք:
-Թե կառավարությունը, թե մեր նախագահը բազմիցս շեշտել է մարզի, հատկապես Կապանի ռազմավարական նշանակությունը: Բայց եթե փորձենք այդ ամենը վերածել ինչ-որ նյութական արժեքների կամ ավելի մեծ ուշադրության այստեղ ծավալվող ինչ-որ գործընթացների նկատմամբ, կամ ինչ-որ զարգացման ծրագրեր բերվեն այստեղ, ոչ: Միգուցե նաև այն պատճառով, որ մարզում կան երկու խոշոր ձեռնարկություններ և նրանց աջակցությունը քաղաքը տարիների ընթացքում զգացել է: Գուցե նաև դա է պատճառը, որ թե մենք, թե իրենք գտնում են, որ մենք ինչ-որ տեղ նաև համեմատության մեջ ավելի լավ պայմաններում ենք: Նաև համահարթեցման սկզբունքը, դրա հաշվարկման մեխանիզմները, կարծում եմ, ճիշտ չեն հատկապես Կապանի համար` թե որպես հարավային դարպաս, թե որպես ռազմավարական կարևոր նշանակություն ունեցող քաղաք:
