Մայիսի 30-ին Հայաստանում առաջին անգամ կանցկացվի «Մոբայլ հավելվածների ցուցահանդես», որտեղ կհյուրընկալվեն ՏՏ ոլորտի մի շարք ընկերություններˋ Օրանժ Արմենիա, Ինսթիգեյթ մոբայլ, Արմ Թաբ, Էս Էֆ Էլը , Այ Դրամ, Սամսունգ եւ այլն:
Ընկերությունները կներկայացնեն խելացի հեռախոսների եւ սարքերի համար իրենց մշակած ծրագրերըˋ բիզնես, կրթական, ժամանցային եւ սոցիալական ուղղվածությամբ:
«էմ լաբ էկա»–ի տնօրեն Մարիամ Դավթյանը այսօր լրագրողների հետ հանդիպմանն ասաց, որ այսօր Հայաստանում ստեղծվում են հետաքրքիր եւ բազմազան «խելացի հեռախոսների» ծրագրեր, որոնք մրցունակ են աշխարհում:
Դա հիմք հանդիսացավ առաջին անգամ անցկացնելու այս ցուցահանդեսը:
«Այդ ծրագրերի վրա ստեղծվել են կայուն ու զարգացած բիզնեսներ: Նպատակ ունենք խրախուսել, որ այս ոլորտում նոր ընկերությունները գործունեություն ծավալեն: Ցուցահանդեսին մասնակից ընկերությունները կներկայացնեն իրենց արտադրանքը: Փորձարկվելու են նաեւ առաջին հայկական arm tab պլանշետները»,-ասաց Դավթյանը:
Մայքրոսոֆթ ինովացիոն կենտրոնի տնօրեն Եվա Հյուսյանը նշեց, որ ցուցահանդեսին ներկայանալու են նաեւ ԱՊՀ երկրներից ներկայացված թիմեր:
Այցելուների համար միջոցառումը բաց է լինելու: Ցուցահանդեսը տեղի կունենա Սիրահարների այգում:
