Հայաստանի ֆուտբոլի ազգային թիմի մարզիչ Խոակին Կապառոսը ցանկություն ունի կարևոր դեր խաղալ ընտրանու զարգացման գործում:
«Վերջերս հանդիպեցինք ՀՖՖ ֆուտբոլի դեպարտամենտի, բժշկական ծառայության ղեկավարի, հավաքականի ադմինիստրատորի հետ: Խոսում էինք մեր փիլիսոփայության և թիմային աշխատանքի կարևորության մասին: Ֆեդերացիայի ներկայացուցիչները մեզ տեղեկություն էին հաղորդում հավաքականի աշխատանքների և տեխնիկական հարցերի շուրջ: Ինձ դուր եկավ նրանց նվիրվածությունն ու պատրաստակամությունը: Մարդկային գործոնի առմով մեզ որևէ մեկը չի կարող գերազանցել»,-«Արմենպրես»-ի հաղորդմամբ` ՀՖՖ տարածած տեսանյութում ասում է մարզիչը:
Կապառոսը մեծ խանդավառությամբ և հույսով է սպասում Մակեդոնիայի դեմ արտագնա խաղին: «Մտադիր ենք տղաներին ասել, որ նրանց շատ ենք վստահում: Կարծում եմ նրանք էլ մեր փորձի և ցանկության կարիքն ունեն: Կփորձենք կարևոր դեր ունենալ Հայաստանի հավաքականի զարգացման հարցում»,-ասել է նա:
Խոակին Կապառոսը ծնվել է 1955 թվականի հոկտեմբերի 15-ին՝ իսպանական Ուտրետա քաղաքում։ Հայտնի է Բիլբաոյի «Ատլետիկ»-ում, «Դեպորտիվո»-ում և, հատկապես, «Սևիլիա»-ում կատարած մարզչական աշխատանքով: «Սևիլիա» ֆուտբոլային ակումբի ղեկին ամենաշատ հանդիպումներ անցկացրած մարզիչն է: 2019 թվականին Կապառոսը պարգևատրվել է Սևիլիա նահանգի Ոսկե մեդալով։
