Կառավարության հինգշաբթի օրվա նիստում բացասական եզրակացություն կտրվի Ազգային ժողովի պատգամավորներ Լյովա Խաչատրյանի, Աբրահամ Մանուկյանի, Արմեն Ավետիսյանի, Գրիգոր Գրիգորյանի, Միքայել Մելքումյանի, Էլինար Վարդանյանի և Մարտուն Գրիգորյանի՝ օրենսդրական նախաձեռնության կարգով ներկայացրած «Հuկիչ-դրամարկղային մեքենաների կիրառման մաuին» Հայաuտանի Հանրապետության օրենքում փոփոխություններ կատարելու մասին» օրենքի նախագծին:
Պատգամավորներն առաջարկում են վերանայել հսկիչ-դրամարկղային մեքենաների կիրառման և հսկիչ-դրամարկղային մեքենաների միջոցով դրամական հաշվարկների կանոնները չպահպանելու դեպքերի համար «Հսկիչ-դրամարկղային մեքենաների կիրառման մասին» ՀՀ օրենքի 11-րդ հոդվածով սահմանված պատասխանատվության միջոցների կիրառության մոտեցումները, ինչպես նաև շեշտակիորեն նվազեցնել նշյալ հոդվածով սահմանված պատասխանատվության չափերը: Օրինակ՝ առաջարկվում է տուգանքների մեծությունը կախվածության մեջ դնել խախտումը կատարող տնտեսվարող սուբյեկտի ԱԱՀ վճարող համարվելու հանգամանքի հետ: Առաջարկվում է նաև հսկիչ-դրամարկղային մեքենայի բացակայության համար սահմանված տուգանքները ԱԱՀ վճարող համարվող կազմակերպությունների և անհատ ձեռնարկատերերի համար նվազեցնել 2 անգամ, իսկ ԱԱՀ վճարող չհամարվող կազմակերպությունների և անհատ ձեռնարկատերերի համար՝ 4 անգամ:
«Նախագծով ներկայացված առաջարկությունների ընդունումը էականորեն կնվազեցնի տնտեսվարող սուբյեկտների իրական շրջանառությունը թաքցնելու արատավոր պրակտիկայի վերացման ուղղությամբ հարկային մարմնի կողմից իրականացվող միջոցառումների արդյունավետությունը»,- ասված է կառավարության բացասական եզրակացության հիմնավորման մեջ, որը կազմել է ՀՀ ֆինանսների նախարարությունը:
