Երևանի թիվ 1 տուն-ինտերնատը գործում է 1980 թվականից: Այնտեղ այժմ բնակվում է 230 շահառու: Կա ևս 20 ազատ տեղ: Ինտերնատը հյուրընկալում է շահառուների՝ Հայաստանի բոլոր մարզերից:
«Մինչև հունվար ընդունելությունն իրականացվում էր Սոցապ նախարարության ուղեգերով, իսկ հունվարից հետո ընդունելությունն իրականացնում են տարածքային սոցապ բաժինները՝ սոցապ նախարարության հետ ճշտելով: Սա արվում է այն նպատակով, որպեսզի օրինակ, Սյունիքից կամ մյուս մարզերից չգան հասնեն մեզ մոտ»,- ասում է փոխտնօրենը:
Ըստ փոխտնօրեն Արթուր Մարկոսյանի՝ ծերերը հիմնականում այնտեղ են գնում ոչ թե սոցիալական խնդիրներից դրդված, այլ ընտանեկան խնդիրների պատճառով: Նրա խոսքով՝ կան ծերեր, ում հաճախ են այցելում, կան նաև այնպիսինները, որոնք ընդհանրապես այցելուներ չեն ունենում:
«Եղել են դեպքեր, երբ սոցիալական պայմաններից դրդված ծնողներին բերել, տեղավորել են, որոշ ժամանակ անց, երբ լուծվել են խնդիրները, նորից հետ են տարել ծնողներին»,- ասում է Արթուր Մարկոսյանը:
Տուն-ինտերնատը ֆինանսավորվում է պետբյուջեից: Փոխտնօրենի խոսքով, թեև ներկայում ավելի քիչ է բարերարներից օգնությունը, այնուամենայնիվ, Գերմանիայի դեսպանատան աջակցությամբ շուտով կվերանորոգվեն շենքի լոգասենյակները:
