Իրավիճակն Էջմիածնում`այսօր (տեսանյութ,լուսանկարներ)

Երեկ վարչապետ Նիկոլ Փաշինյանը հայտարարեց` երկրում կորոնավիրուսի նման տեմպերի զարգացման դեպքում կառավարությունն ստիպված կլինի անցնել կոշտ միջոցների:

Araratnews.am-լրատվականը շրջել է Էջմիածնի փողոցներով, որպեսզի պարզի, թե քաղաքացիներն ինչպես են պահպանում արտակարգ դրության պայմանները:

Վարչապետի հայտարարությունից հետո, այսօր Էջմիածնի քաղաքապետ Դիանա Գասպարյանը կոչով դիմեց քաղաքացիներին, որպեսզի պահպանվեն համաճարակային անվտանգության կանոնները:

Էջմիածնի փողոցներում այսօր համեմատաբար քիչ մարդ կար: Կենտրոնական փողոցները սովորաբար մարդաշատ են լինում, բայց այսօր հակառակ պատկերն էր: Քաղաքի կենտրոնական հրապարակում և Մայր Աթոռի շրջակայքում գրեթե մարդ չկար։ Սրճարաններն էլ կիսադատարկ էին:

Անցորդները հիմնականում դիմակներով էին, չհաշված որոշ կարգազանցների, իսկ մարդկային կուտակումներն անհամեմատ նվազել էին. տեղ-տեղ կարելի էր հանդիպել 3-4-հոգանոց փոքր խմբերի:

Նկարահանման պահին քաղաքապետարանի հարակից այգում մի քանի երեխա կար: Հիմնականում դիմակներով`պահպանելով սոցիալական հեռավորությունը:

Ի դեպ, նկատեցինք, որ քաղաքային տրանսպորտից օգտվող  էլ գրեթե չկար: Անգամ ոստիկանական հսկիչ խմբերի չհանդիպեցինք: Կանգառներում և փողոցներում իրավապահ համակարգի ոչ մի ներկայացուցիչ չկար, թեպետ վաղ առավոտից ոստիկանական շրջիկ մեքենաները բարձրախոսներով  իրազեկում են քաղաքացիներին, որպեսզի պահպանեն պարետի որոշումները։

Երկրում վարակի օրեցօր աճը և մահացությունների պատճառը կանոնները չպահպանելն է: Ստեղծված ծանր կացությունից դուրս գալու ելքը յուրաքանչյուրիս պատասխանատվությունից է կախված: Այլապես վիրուսի ճիրաններից ազատվել չի լինի:

Հայկ Մագոյան