Իտալիայի վարչապետ Էնրիկո Լետան պատրաստվում է վստահության քվե խնդրել երկրի խորհրդարանից և այդ հարցով հոկտեմբերի 2-ին դիմել օրենսդիրին։ Այս մասին նա հայտարարել է երեկ՝ հանդիպելով Իտալիայի նախագահ Ջորջիո Նապոլիտանոյին։
«Չորեքշաբթի, հնարավոր է, մենք գնանք խորհրդարան և երկու պալատներից վստահության քվե պահանջենք։ Յուրաքանչյուրն այստեղ իր պատասխանատվությունը կստանձնի։ Ես մտադիր չեմ ամեն գնով իշխանության մնալ։ Անհրաժեշտ է վստահություն, որպեսզի շարունակենք այս ծրագիրը։ Եթե չլինի, ապա կլինեն հետևություններ», — ասել է Լետան։
Գործադիր մարմնում խնդիրներն առաջացել են այն բանից հետո, երբ շաբաթ օրը Սիլվիո Բերլուսկոնիի «Ազատության ժողովուրդը» հայտարարել է, որ դուրս է գալիս կառավարական կոլաիցիայից, քանի որ նման կազմով չի կարողանում իրականացնել նախընտրական խոստումները։ Այս պահին երկրի խորհրդարանում Լետային անհրաժեշտ է 161 պատգամավորի աջակցություն, սակայն վստահության քվե պատրաստ են տալ 143-ը։
