Իսլանդիայի գարեջրագործական Steojar ընկերությունը հատուկ տեղական ձմեռային փառատոնի առիթով 5,2% թնդությամբ գարեջուր է պատրաստել՝ կետի մսի համով: Գարեջուրն արտադրողները հավաստիացնում են, որ ալկոհոլային խմիչքը «իսկական վիկինգների համար» է, իսկ բնապահպանները այն հանցագործություն են համարում,- հաղորդում է Mirror-ը:
Steojar ընկերության ներկայացուցիչների հաղորդմամբ, կետի մսից պատրաստված գարեջուրն օգտակար է առողջության համար, քանի որ այն պարունակում է մեծ քանակությամբ սպիտակուցներ, քիչ ճարպ և ընդհանրապես շաքար չի պարունակում:
Սակայն կետերի և դելֆինների պաշտպանության շարժման ներկայացուցիչներն այս գարեջրի օգտագործմանը դեմ են արտահայտվել:
«Մի կողմից, կետի միսը բավական քիչ պահանջարկ ունի, բայց մյուս կողմից, մի պահ մտածեք՝ որքանո՞վ է մարդասիրական ընդհամենը մեկ շիշ գարեջրի համար սպանել այդ մեծ, գեղեցիկ և խելացի կենդանուն, որը կարող էր մինչև 90 տարի ապրել»,-ասել է կենդանիների իրավունքները պաշտպանող կազմակերպության ներկայացուցիչը:
