Մարդկային քաղաքակրթության ստեղծման օրրանը՝ Հայաստանը, իր՝ Հռոմից էլ հին մայրաքաղաք Երևանով, մշտապես աշխարհին գրավել է իր ինքնատիպ ճարտարապետական լուծումներով, կոթողների յուրօրինակ գրավչությամբ:
Մեր սիրելի «վարդագույն քաղաքի» պատմությանն է անդրադարձել Forbes-ի սյունակագիր Թոմ Մուլլոն՝ նշելով, որ քաղաքամայր Երևանը, ըստ վիճակագրության, աշխարհի մյուս քաղաքների համեմատությամբ անվտանգ է, որտեղ կարելի է հանգիստ զբոսնել, մեկ գավաթ սուրճ խմել և Կասկադի բարձրությունից հիանալ քաղաքի համայնապատկերով, հարակից ճարտարապետական լուծումներով և մասնավորապես՝ գիշերային լույսերով զարդարված հին ու բարի քաղաք Երևանի գրավչությամբ:
Նշենք, որ հեղինակն անդրադարձել է նաև Ալեքսանդր Թամանյանին ու Կասկադի ստեղծման պատմության էջերին՝ ներկայացնելով հակիրճ տեղեկություն մայրաքաղաքային ճարտարապետությունից:
Թոմ Մուլլոն գրում է՝ Կասկադ համալիրում գտնվում են ցուցասրահներ, շատրվաններ, ծաղկանոցներ և հարթաքանդակներ։ Համալիրի վերևում գտնվում է Հոկտեմբերյան հեղափոխության 50-ամյակին նվիրված հուշարձան (1967 թ.)։
Հավելենք, որ Կասկադ համալիրի շինարարութունը դադարեցվեց 1988 թ. Հայաստանում տեղի ունեցած երկրաշարժի և 1991 թ. Խորհրդային միության փլուզման հետևանքով, իսկ 2002 թվականին՝ ամերիկահայ մեծ գործարար և բարեգործ Ջերարդ Լ. Գաֆէսճեանը (1925-2013) Երևանի քաղաքապետարանի և ՀՀ կառավարության հետ նախաձեռնեց Կասկադի վերականգնումը:
Ներքևում՝ համալիրի առջևում Ալեքսանդր Թամանյանի արձանն է։
Անդրադարձը՝ Վարդիթեր Գիշյանի
