Մեկնարկել է ՀՀ ԱԺ յոթերորդ գումարման չորրորդ նստաշրջանի արտահերթ նիստը:
Արայիկ Հարությունյանը ներկայացնում է «Նախադպրոցական կրթության մասին» ՀՀ օրենքում փոփոխություն կատարելու մասին օրենքի նախագիծը, որով սահմանվում են նախադպրոցական կրթության բնագավառում պետական քաղաքականությունը և դրա սկզբունքները։
ԿԳՄՍ նախարար Արայիկ Հարությունյանն իր ելույթում մասնավորապես նշեց.
«Եկեք երեխաներին չտանջենք և, ըստ էության, նախադպրոցական ուսումնական հաստատություններում տանք այն գիտելիքը, որն անհրաժեշտ է տվյալ տարիքի համար: Հիմա կան տարբեր զարգացման կենտրոններ, տարբեր մանկապարտեզներ, որոնք լեզուների ուղղությամբ են և այլն: Դրանք, ես վստահեցնում եմ, ամենևին դրական ազդեցություն չեն ունենում երեխայի ընդհանուր կրթական մակարդակի վրա՝ ընդհակառակը, շատ վատ տրամադրություններ են առաջացնում այդ երեխաների մոտ և, երբ որ նրանք գնում են դպրոց, դպրոցի որոշ ծրագիր արդեն յուրացրած են լինում մանկապարտեզներում, ինչը սխալ է մանկավարժական առումով և ոչ բարենպաստ պայմաններ է ստեղծում երեխայի բնականոն զարգացման համար»:
