Կառավարության համապատասխան որոշման նախագծով, որն ընդունվեց վերջին նիստի ընթացքում, ենթադրվում է. տրանսպորտային միջոցը կարող է հաշվառման կանգնեցվել օտարերկրացու անունով, եթե այդ անձը ունի հաշվառման հասցե բնակչության պետական ռեգիստրում։ Սույն ռեգիստրում գրանցման համար ներկայացվող փաստաթղթերի կազմում է դիմումատուի կացության կարգավիճակի համապատասխան քարտը։
Կացության կարգավիճակը լինում է՝ մշտական, ժամանակավոր (երբ անձը հիմնավորում է մեկ տարի և ավելի ժամկետով բնակության պահանջի հանգամանքը) և հատուկ։ Ժամանակավոր կացության տրամադրման ընթացակարգը ենթադրում է դիմում, հարցաթերթիկ, առողջապահական տեղեկանք, նկար, պետական տուրք՝ 105,000 դրամի չափով, և այլն, բայց ամենակարևորը՝ տրամադրման ժամկետը 30 օրվա ընթացքում է։ Կացության կարգավիճակ ստանալուց և հետագայում բնակչության պետական ռեգիստրում գրանցվելուց հետո անձը կարող է դիմել հաշվառման հասցեի տեղեկանք ստանալու համար, որն էլ տրամադրվում է 1 աշխատանքային օրվա ընթացքում։
Տնտեսագետ Լեւոն Սահակյանն Araratnews.am-ի հետ զրույցում ասաց, որ եթե կառավարության (26.09.19 թվականի 1251) որոշման նախագիծը հաստատվի, ապա օտարերկրացիներին հոկտեմբերի 5-ից հետո ավտոմեքենա չեն կարող վաճառել ներկայիս ընթացակարգով։ Հարկավոր է լինելու գնորդի անունով տեղեկանք բնակչության պետական ռեգիստրից։
Տնտեսագետն առաջարկում է կառավարությանը կամ փոփոխել որոշումը, կամ կացության կարգավիճակ տալու ժամկետը 30-ից կրճատել և դարձնել 2-3 օր, որպեսզի օտարերկրացիներին ավտոմեքենա վաճառելը հնարավոր դառնա։ Այլապես, անգամ տեսականորեն, հնարավոր չի լինի գնորդին ամսից ավելի սպասման մեջ թողնել։
Զրուցակիցս լիահույս է, որ առկա մտահոգությունը չի վրիպի կառավարության ուշադրությունից։