Ինչպես արդեն տեղեկացրել էինք, Երևանի քաղաքապետ Հայկ Մարությանը ինքնամեկուսացել է վարակակրի հետ ակտիվ շփման պատճառով:
Քաղաքապետի առողջական վիճակի մասին մանրամասներ իմանալու համար զրուցեցինք քաղաքապետ Հայկ Մարությանի մամուլի խոսնակ Հակոբ Կարապետյանի հետ:
«Քաղաքապետն իրեն շատ լավ է զգում: Աշխատանքի մեջ է: Ինքնամեկուսացումից հետո անցել է հեռավար աշխատանքի»,- ասաց Հակոբ Կարապետյանը:
Մեր հարցին, թե քաղաքապետը թեստավորվել է, խոսնակը պատասխանեց.
«Ես չգիտեմ: Թեստ հանձնելու անհրաժեշտություն եթե լինի, անպայման քաղաքապետը կհանձնի»:
Հակոբ Կարապետյանից հետաքրքրվեցինք`կա՞ն քաղաքապետարանում կորոնավիրուսով վարակվածներ, թե ոչ:
Հարցին ի պատասխան՝ Կարապետյանն ասաց.
«Քաղաքապետարանում վիճակը նորմալ է, վարակվածներ իհարկե կան: Դրանք մի քանի առանձին դեպքեր են»:
Քաղաքապետարանում վարակվածների մասին հստակ թվեր մամուլի խոսնակը դժվարացավ նշել:
Մենք հետաքրքրվեցինք, թե քաղաքապետ Հայկ Մարությանը երբ կվերադառնա քաղաքապետարան աշխատանքի:
Հակոբ Կարապետյանն ասաց, որ քաղաքապետը աշխատանքի կգա հավանաբար հաջորդ շաբաթվա մեջ:
Հայկ Մագոյան
