ԱԺ ԲՀԿ պատգամավոր Նաիրա Զոհրաբյանը երթևեկության կանոնների խախտման դիմաց կիրառվող տուգանքների չափը համարում է խելագարության կանխավարկած:
Վիճակագրական տվյալների համաձայնˋ վերջին տարիներին ճանապարհային կանոնների խախտման դեպքերի եւ զոհերի թիվը ավելացել է Հայաստանում:
«Եթե ասում եք, որ տուգանքների չափը համաչափ է, ապա ասեմ, որ չկա աշխարհում մի երկիր, որտեղ տուգանքները այդքան անհամաչափ լինեին, ինչպես Հայաստանում է՝ քաղաքացու ստացած եկամուտների դիմաց: Պաշտոնական վիճակագրական տվյալներով ՀՀ-ում 1 միլիոն մարդ ապրում է աղքատության սահմանային գծում, էլ չեմ խոսում սահմանագծից ներքեւ ապրողների մասին: Սա միթե վիճակագրություն չէ հասկանալու համար, որ չի կարող 40 հազար աշխատավարձ ստացող քաղաքացու համար 30 հազար կամ 80 հազար տուգանքը լինել ընդունելի»,-խորհրդարանական լսումների ժամանակ ասաց Զոհրաբյանըˋ խոսքն ուղղելով ՀՀ ոստիկանության պետի տեղակալ Արթուր Օսիկյանին:
Նա բերեց մի օրինակ խախտումների եւ դրանց դիմաց կիրառվող տուգանքների հետ կապված.
«Դեղին լույս է, մեքենան անցնում է: Փոխվում է կարմիր, վարորդը o,2 մմ հատել է հոծ գիծը, հետընթաց կատարել չի կարող, որովհետեւ հետեւում մեքենա է, եւ վարորդը տուգանվում է 5000, կամ 10 հազար դրամ: Պարոն Օսիկյան, դուք ասում եք, որ դա համաչափ է, ես ասում եմ, որ խելագարության կանխավարկած է»,- ասաց Զոհրաբյանը:
