Աշխարհի նախկին չեմպիոն, հայազգի Արթուր Աբրահամը այսօր լրագրողների հետ հանդիպմանը նշեց, որ մի քանի օր է, ինչ Հայաստանում է:
Գերմանիայի դրոշի ներքո հանդես եկող բռնցքամարտիկը նշեց, որ մեկ շաբաթ Հայաստանում հանգստանալուց հետո կվերդառնա Գեմանիա:
Բռնցքամարտիկը նշում է, որ առաջիկայում պատրաստվում է իր համար ամենակարեւոր մենամարտին:
«Գերմանիայում փետրվարի 1-ին լինելու է աշխարհի չեմպիոնատի մենամարտը: Ես մրցելու եմ Ռոբերտ Շտիգլիցի հետ: Դա իմ կյանքի ամենակարեւոր մենամարտն է, եւ պարտավոր եմ անելու ամեն ինչ, ներդնելու ամեն ինչ, որ հաղթեմ, որ լինեմ կրկնակի աշխարհի չեմպիոն»,-ասաց Արթուր Աբրահամը:
Նա նշեց, որ առաջիկա 2 տարիներին մենամարտելուց հետո հաջողություն կասի բռնցքամարտին:
«Դե 11 տարեկանից ես արդեն լուրջ սպորտի մեջ եմ ու գալիս է ժամանակ, որ պետք է ասես հաջողություն եւ ճիշտ ժամանակին պետք է հեռանաս»,-ասաց նա:
Արթուր Աբրահամը կարծում է, որ Հայաստանը մի քանի անգամ ապացուցել է, որ բռնցքամարտով բարձր մակարդակի վրա երկիր է: Նա նշում է որ վերջին տարիներին փոխել է իր մենամարտերի տակտիկան:
«Առաջ շատ էի պաշտպանվում եւ նոկաուտի գնում: Բայց այժմ տակտիկաս փոխել եմ եւ ավելի բարձր միավորներով եմ փորձում խաղը տանել: Հարվածի ուժը իհարկե դրանից չի թուլանում, այն գնալով մեծանում է»,-ասում է հայազգի բռնցքամարտիկը:
Նա նշեց նաեւ, որ Հայաստան էր եկել ոչ միայն հանգստանալու, այլեւ մասնակցելու ծառատունկի եւ Երեւանի թիվ 99 դպրոցում, որտեղ նա սովորել է, մարզական ակումբի բացմանը:
«Մենք Մասիս քաղաքում եկեղեցի ենք կառուցել եւ եկել էի ծառատունկի եկեղեցու բակում անցկացնելու: Իսկ դպրոցում ուր ես սովորել եմ, աջակցել եմ, որպեսզի մարզական ակումբ բացվի եւ վաղը մասնակցելու եմ նաեւ բացմանը»,-հավելեց Աբրահամը:
Բռնցքամարտիկը հավելեց, որ Գերմանիա վերդառնալուն պես սկսելու է մարզական պարապմունքները մասնակցելու համար իր կյանքում ամենակարեւոր մենամարտին փետրվարի 1-ին:
Իսկ լրագրողների այն հարցին, ունի նա կյանքի ընտրյալ , թե ոչ, պատասխանեց.
«Այո, ունեմ եւ իհարկե նա հայուհի է: Հետագայում ավելի հստակ կհայտնեմ մամուլին մեր հարաբերությունների մասին»,-ասաց Արթուր Աբրահամը:
Լիլիթ Առաքելյան
