Գյուղատնտեսության ոլորտում այս տարի էական դրական տեղաշարժեր են գրանցվել: Այս մասին այսօր հայտարարեց գյուղատնտեսության նախարար Սերգո Կարապետյանը իր տարեվերջյան ամփոփիչ ասուլիսում: Նրա խոսքով՝ գյուղատնտեսության համախառն արտադրանքը այս տարվա առաջին 11 ամիսներին գերազանցել է նախորդ տարվա ցուցանիշը 6.1%-ով: Սպասվում է, որ դեկտեմբերին լուրջ աճ կլինի անասնապահության բնագավառում, ինչը տարվա ընդհանուր ցուցանիշը է՛լ ավելի կբարելավի:
Գյուղնախարարը կարևորեց հատկապես գյուղատնտեսական մշակաբույսերի ցանքատարածությունների ավելացումը: Վերջին երեք տարիներին դրանք ավելացել են 35 հազար հեկտարով, ընդ որում այս տարի՝ մոտ 14 հազար հեկտարով: Վարելահողերի նպատակային օգտագործման մակարդակը այս տարի կազմել է 71%՝ նախորդ տարվա 63.2%-ի փոխարեն:
