Պաշտոնական Բաքուն Լեռնային Ղարաբաղի հակամարտության խաղաղ կարգավորման վերաբերյալ իր դիրքորոշումն է ներկայացրել ԵԱՀԿ նախարարների խորհրդի մասնակիցներին։
Հանդիպումը նախանշված է դեկտեմբերի 5-ին՝ Բրատիսլավայում։ Ինչպես տեղեկացնում է Minval.az-ը, Ավստրիայում, Սլովակիայում և Սլովենիայում Ադրբեջանի դեսպանատան կողմից Twitter-ում հրապարակված փաստաթղթում նշվում է, որ Ադրբեջանի Հանրապետությունը հանձնառու է լուծել հակամարտությունը քաղաքական միջոցներով՝ ԵԱՀԿ Մինսկի խմբի շրջանակներում:
Փաստաթղթում մասնավորապես նշված է․ «Հակամարտության կարգավորումը հնարավոր է միայն Հելսինկյան եզրափակիչ ակտում ամրագրված միջազգային իրավունքի նորմերի և սկզբունքների հիման վրա՝ ամբողջությամբ հարգելով Ադրբեջանի Հանրապետության ինքնիշխանությունն ու տարածքային ամբողջականությունը նրա միջազգայնորեն ճանաչված սահմաններում»: Ադրբեջանական կողմը նշում է, որ հավատարիմ է հակամարտության լուծման փուլային մոտեցմանը, որը հիմնված է ՄԱԿ-ի Անվտանգության խորհրդի բանաձևերի և ԵԱՀԿ որոշումների, մասնավորապես, 1994 թ. Բուդապեշտի գագաթնաժողովի որոշման վրա:
Փաստաթղթում նշվում է նաև.
«Առաջին քայլը պետք է լինի հայկական զինված ուժերի ամբողջական և անվերապահ դուրս բերումը Լեռնային Ղարաբաղից և Ադրբեջանի գրավյալ այլ տարածքներից:
Դրան պետք է հաջորդեն բռնի տեղահանված Ադրբեջանի բնակչության վերադարձը՝ անվտանգության բոլոր անհրաժեշտ միջոցառումներին համապատասխան, ինչպես նաև տարածաշրջանում հաղորդակցման ուղիների բացումը:
Հաջորդ փուլն Ադրբեջանը տեսնում է իր կազմում Լեռնային Ղարաբաղի տարածաշրջանի կարգավիճակի որոշումը՝ Ադրբեջանի Սահմանադրության և օրենսդրության համաձայն:
Նման կարգավիճակը պետք է ապահովի տարածաշրջանի հայ և ադրբեջանական համայնքների խաղաղ գոյությունը, երաշխավորի մարդու իրավունքների և ազատությունների լիարժեք իրացումը հավասար և ոչ խտրական հիմունքներով»:
«Կարգավիճակի որոշումը պետք է տեղի ունենա խաղաղ պայմաններում՝ իրավական գործընթացի շրջանակներում, Լեռնային Ղարաբաղի շրջանի բնակչության, մասնավորապես՝ հայկական և ադրբեջանական համայնքների անմիջական, լիարժեք և հավասար մասնակցությամբ, և Ադրբեջանի կառավարության հետ նրանց փոխգործակցությամբ՝ բացառապես իրավական և ժողովրդավարական գործընթացի շրջանակներում»,- նշվում է փաստաթղթում:
Փաստաթղթի եզրափակիչ մասում նաև ասվում է, որ Ադրբեջանը վերը նշված շրջանակից դուրս հակամարտության քաղաքական լուծում չի տեսնում:
Հավելենք, որ այսօր Բրատիսլավայում կայանալու է նաև Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը։
Azerbaijan presented its position with regard to the peaceful settlement of the conflict in and around the Nagorno-Karabakh region of Azerbaijan at the @OSCE Ministerial Council in #Bratislava. #MC2019 @AzEmbAustria Full text ➡ pic.twitter.com/Arht6IqD6Z
— AzEmbAustria (@AzEmbAustria) 3 декабря 2019 г.
