Վարչապետ Նիկոլ Փաշինյանը պաշտոնական այցով Վրաստանում է: Վրաստանի վարչապետ Գեորգի Գախարիայի հետ հանդիպմանը Նիկոլ Փաշինյանն ուշագրավ առաջարկ է արել, ավելի ճիշտ՝ կրկնել նախորդ տարվա իր հայտարարությունը. Հայաստանը Վրաստանի հետ համագործակցությունը պատկերացնում է նաև ռազմավարական տեսակետից:
Վրացագետ Արսեն Խառատյանը Araratnews.am-ի հետ զրույցում ասաց, որ Վրաստանի եւ Հայաստանի համար ռազմավարական համագործակցությունը զարգացնելու հնարավորություն կա: «Մարտահրավերները նույն են երկու երկրների համար, հետևաբար պետք են համատեղել ջանքեր: Կան ուղղություններ, որտեղ կա համագործակցության լուրջ մակարդակ»,- մանրամասնեց վրացագետը:
Մեր զրուցակիցը հիշեցրեց Վրաստանի պաշտպանության նախարարի այցը Հայաստան: «Կարծում եմ՝ շատ ուղղություններով մենք արդեն գործընկերներ ենք, իսկ թե ինչպես դա կամրագրվի տեքստով, առաջիկայում կերեւա»,- ասաց Արսեն Խառատյանը:
Արդյոք հարեւան Վրաստանը չի հապաղում Փաշինյանի առաջարկն ընդունելիս: Տպավորություն է, որ վարչապետի առաջարկին Վրաստանը զգուշորեն է վերաբերվում: Արսեն Խառատյանը հակադարձում է՝ սա հայտարարություն է առայժմ, ոչ թե առաջարկ: «Այցից հետո, վստահ եմ, կլինեն հայտարարություններ, այնպես որ՝ շահարկումներ հիմա չէի անի»,- հորդորում է բանախոսը:
Հայաստան-Վրաստան ռազմավարական համագործակցությունը, ըստ զրուցակցի, կարող է լինել ահաբեկչության դեմ պայքարում, սահմանային անցակետերի կարգավորման, քանի որ համատեղ խնդիրներ ունենք, համաճարակի, առողջապահական տարբեր խնդիրների դեմ պայքարով:
