Այսօր ՀՀ Կրթության և Գիտության նախարար Արմեն Աշոտյանը իր պաշտոնավարման 100 օրվա կապակցությամբ հանդես եկավ մամլո ասուլիսով և ներկայացրեց, թե ինչ աշխատանքներ են ծրագրել այս տարի ավարտին հասցնելու, կամ սկսելու համար:
Նախարարը այս տարվա ամառային քննությունները համարում է հաջողված:
«Ես համարում եմ, որ քննությունները անց են կացվել արժանահավատ և օբյեկտիվ ձևով: Ճիշտ է մի ծաղկով գարուն չի գալիս, բայց համակարգային փոփոխությունների համար անհրաժեշտ է կայուն քայլեր: Մեր այս տարվա ցուցանիշները պետք լինեն նախորդ տարվա ցուցանիշներից ավելի լավը»,-ասաց Աշոտյանը:
Նա հավելում է, որ այս տարի Ազգային Ժողովում կրթության ոլորտի քննարկումները անցել են ապաքաղաքական ոլորտում և ընդունվել են կարևորագույն օրինագծեր:
«Կարևորագույն է նաև օրինագիծը ուսանողների սոցիալական փաթեթի վերաբերյալ: Այն օրինագիծը, որով մենք սահմանեցինք պետական բյուջեից որոշ ուսանողների վարձավճարի փոխհատուցում: Պետությունը երաշխավորում է, որ այս կերպ ապահովել է 10 տոկոս անվճար կրթություն»,- ասաց Աշոտյանը:
Նախարարը նշեց, որ նախարարությունը Համաշխարհային բանկի հետ համագործակցելու շնորհիվ սկսել է նոր վարկային ծրագիր:
«Հայաստանը արդեն ծրագրել է և ֆինանսական համաձայնագիր է կնքելˋ շուրջ 25 միլիոնի վարկային ծրագիր, որով ծրագրեր են իրականացնելու կրթության ոլորոտում: Նոր վարկային ծրագիրով մենք ունենք երկու բաղադրիչ: Առաջինըˋ ՀՀ բոլոր ավագ դպրոցների համար մենք գնելու ենք համապատասխան դպրոցական կահույք»,-ասաց Աշոտյանը:
Նա նշեց, որ ավագ դպրոցներում կներդրվի կրեդիտային համակարգ:
«Կրեդիտային համակարգը բուհական կրթության ոլորտում ապացուցված է, որ հաջողված է թե Եվրոպայում, թե Հայաստանում: Ակնհայտ է, որ ավագ դպրոցներում, եթե այն ներդրվի, ոչ մասնագիտական առարկաներից աշակերտը կարող է կրեդիտներ ապահովել»,-ասաց ԿԳ նախարարը:
