Անցյալ տարի ՀՀ Գյուղատնտեսության նախարարությունը հպարտորեն հայտարարում էր, որ ծիրանի մթերման ծավալը շուրջ 47 տոկոսով գերազանցել է նախորդ տարվա մթերման ցուցանիշը: Գյուղնախարար Սերգո Կարապետյանը չէր դադարում հայտարարել, որ իրենք մշտական կապի մեջ են մթերող ընկերությունների և գյուղացիների հետ և առաջացած խնդիրները պետության ուշադրության կենտրոնում են: Եվ ահա մոտենում է 2014 գյուղատնտեսական աշխատանքների սկիզբը, իսկ մի շարք գյուղերում ֆերմերները դեռևս չեն ստացել անցյալ տրավ ծիրանի իրենց գումարները: Նմանատիպ գյուղերի շարքին է պատկանում Արարատի մարզի Ջրաշեն գյուղը: Գյուղի շատ բնակիչներ դեռևս չեն ստացել իրենց գումարները և հույս էլ չունեն, որ մոտակա ժամանակներում կստանան.«Անցյալ տարի մթերված ծիրանի մեծ մասի համար մեզ չեն վճարել: Ասում են բերքը լավը չի եղել և «տակ տված» են գործից դուրս եկել»,-AraratNews.am-ի հետ զրույցում ասաց գյուղացիներից մեկըˋ չցանկանալով ներկայանալ, որպեսզի գյուղում անհարմար խոսակցությունների մեջ չընկնի: Մեր զրուցակիցը նեղսրտեց պետության անտարբերությունից և համոզված է, որ եթե անգամ իրենք բարձրաձայնեն պետական մարմինները շարունակելու են ձեռքները ծալած նստել. «Եթե իմանանա էլ՝ բան չեն անելու: Մենք իրենց համար չկանք: Եթե լուրջ պետական կառույցներ լինեին, ապա խնդիրը այսպես չէին թողնի: Հասկանում եք, մի քանի բիզնեսմեններ որոշել են, որ «տակ տալու» դեպքում չպիտի գյուղացիներին վճարեն: Հերիք չի շատ էժան գներով են տանում, մի կողմից էլ՝ իրենք ռիսկը իրենց վրա չեն վերցնում»,- նկատեց մեր զրուցակիցը:
