Հայաստանում բնակվում է շուրջ ութ հազար հաշմանդամություն ունեցող երեխաներ, որոնք ամեն օր հանդիպում են բազմաթիվ խնդիրների։ Այս խնդիրների շարքում, ցավոք, դեռևս գլխավոր տեղ է զբաղեցնում նաև հասարակության ոչ պատշաճ՝ խտրական ու կարծրատիպեր ստեղծող վերաբերմունքը, որի պատճառով հաշմանդամություն ունեցող երեխաներից շատերը զրկված են անհոգ ու լիարժեք մանկություն վայելելու հնարավորությունից, իսկ նրանց մի մասն էլ շարունակում է գտնվել փակ հաստատություններում հայտնվելու վտանգի առջև։
Հաշվի առնելով վերը նշվածը՝ երեխաների պաշտպանության միջազգային օրվա՝ հունիսի 1-ի կապակցությամբ, «Էխո» հաշմանդամություն ունեցող անձանց հասարակական կազմակերպությունը նախաձեռնել և իր համախոհների հետ պատրաստել է սոցիալական հոլովակ, որը նպատակ ունի մեկ անգամ ևս բարձրաձայնելու, որ հաշմանդամություն ունեցող և չունեցող երեխաներն ունեն միևնույն՝ անհոգ, երջանիկ, պաշտպանված ու ջերմ ընտանեկան միջավայրում ապրելու իրավունքը։
Սոցիալական հոլովակը տեղադրված է «Էխո» կազմակերպության Youtube-յան պաշտոնական էջում՝ հետևյալ հղումով՝ https://youtu.be/Y190xtQX-pM
