ԱՄՆ-ի Սենատը որոշում է կայացրել աջակցություն հայտնել ուկրաինացի ժողովրդին` կոչ անելով իշխանություններին զերծ մնալ ցուցարարների նկատմամբ ուժի կիրառումից և ազատ արձակել բոլոր այն ձերբակալվածներին, ովքեր մեղադրվում են հանրահավաքների և երթերի ժամանակ անկարգություններ կազմակերպելու և դրանց մասնակցելու մեջ: Այս մասին ասվում է Ուկրաինայում ԱՄՆ դեսպան Ջեֆրի Պայետի Twitter-ի էջում:
«Անցած գիշեր ԱՄՆ Սենատը ուկրաինացի ժողովրդին աջակցության բանաձեւ է ընդունել», — գրել է դեսպանը:
Սենատորները կոչ են արել Միացյալ Նահանգների և Եվրամիության առաջնորդներին՝ աջակցել Ուկրաինայում ներքաղաքական ճգնաժամի հաղթահարման գործընթացին: Կոչ է հնչել նաև ընդդիմության և քաղաքացիական հասարակության ներկայացուցիչներին` գտնել ազգային համաձայնության կայացման բանաձևը:
Հիշեցնենք, որ Ուկրաինայի մայրաքաղաքի կենտրոնում և այլ վայրերորւմ ցույցերն ու բողոքի ակցիաները սկսվել են նոյեմբերի վերջին այն բանից հետո, երբ Ուկրաինայի կառավարությունը հայտարարեց եվրաինտեգրման գործընթացը դադարեցնելու մասին:
