Միացյալ Նահանգների պետքարտուղար Ջոն Քերին նախօրեին CBS հեռուստաալիքին տված հարցազրույցում արել է մի շարք ուշագրավ հայտարարություններ, որոնք վերաբերում են Իրանի հետ հարաբերություններին։
Հայտնի է, որ ԱՄՆ-ը խիստ պատժամիջոցներ է կիրառել Իսլամական Հանրապետության դեմ, քանի որ գտնում է, որ վերջինիս միջուկային ծրագիրը թափանցիկ չէ և կարող է հանգեցնել միջուկային զենքի ստեղծմանը։ Սակայն երեկ Քերին ասել է, որ ծրագրի թափանցիկության և խաղաղ բնույթի ապահովման դեպքում իր երկիրը պատրաստ է այդ պատժամիջոցները վերացնել ընդամենը մեկ օրացուցային ամսվա ընթացքում։
Հիշեցնենք նաև, որ Իրանի նախագահի պաշտոնում Հասան Ռուհանիի ընտրությունից հետո լուրջ փոփոխություններ են նկատվում այդ երկրի արտաքին քաղաքականությունում։
