Ամերիկայի հայկական համագումարն աջակցում է Սիրիա ներխուժման համար Թուրքիայի դեմ պատժամիջոցներ կիրառելու վերաբերյալ ամերիկացի սենատորներ Լինդսի Գրեմի և Քրիս Վան Հոլենի առաջարկած օրենսդրական նախագծին:
Օրինագիծը նախատեսում է սահմանափակումներ Թուրքիայի նախագահի, փոխնախագահի, պաշտպանության, արտաքին գործերի, ֆինանսների, առևտրի և էներգետիկայի ու բնական պաշարների նախարարների՝ Ամերիկայում գտնվող ակտիվների նկատմամբ:
Օրինագիծը նաև նպատակ ունի սահմանափակելու Թուրքիայի ռազմական գործողությունները: Պատժամիջոցները կտարածվեն նաև Թուրքիայի էներգետիկ ոլորտի վրա, բացի այդ, կարգելվի ԱՄՆ-ի ռազմական օգնությունը Թուրքիային, և վիզայի սահմանափակումներ կսահմանվեն այն թուրք պաշտոնյաների համար, որոնք մտադիր են այցելել Միացյալ Նահանգներ:
«Ժամանակն է, որ ԱՄՆ կառավարությունը ընդունի, որ Թուրքիան ոչ վստահելի դաշնակից է: ԱՄՆ-ը պետք է դադարեցնի անտեսել Էրդողանից եկող վտանգը»,- նշել են ԱՀՀ-ի համանախագահները:
