Այսօր` Իջևանում, Ճգնաժամային տեղեկատվական կենտրոնում, Տավուշի մարզպետ Հայկ Չոբանյանը ներկայացրեց հրետակոծության հետևանքով առաջացած վնասները, ապա նշեց դրանց վերացման վերջնաժամկետներ:
«Գույքագրման և տվյալների հավաքագրման աշխատանքներն ամենօյա աշխատանք են: Վերականգնման առաջին փուլը մենք կավարտենք մեկ շաբաթից: Վերջնական արդյունքները, ենթադրում ենք, կլինեն մեկ ամսից, քանի որ կառուցվելու են նաև նոր տներ, և դրանց նախագծման աշխատանքների ավարտին նոր միայն պարզ կլինեն հստակ ժամկետները: Բայց ուզում եմ լրացուցիչ անգամ ասել, որ բացի շինարարական վնասներից, կան նաև գյուղատնտեսական և այլ ոլորտներ, որոնք մեր գործընկեր գերատեսչություններին են վերաբերում: Ես կարծում եմ, որ շուտով ընդհանուր գնահատականները կունենանք»,- ասաց Հայկ Չոբանյանը:
Մարզպետը իր խոսքում նաև ընդգծեց, որ այս պահի դրությամբ կա հիսուն շինություն, որոնք այս կամ այն չափով վնասվել են. «Դրանցից 12-ում արդեն սկսվել են վերանորոգման աշխատանքները»,- ասաց նա:
Մարզպետը հավաստիացրեց, որ ամեն ինչ արվելու է, որ այս տարվա ընթացքում բոլոր ավերված տները վերականգնվեն:
Հայկ Մագոյան
